Kommuni pillugu

Kommuni sisamanik illoqarfeqarpoq 23-nillu nunaqarfeqarluni.


Seqineq kaaviinnartoq, qimussit, ilulissat, qaleralik, piniartut qangatut inuusut,
nunaminertaq UNESCO-p kingornussassarititaa, siku, kaperlak, arsarnerit kiisalu
nunaqarfippassuit tassaapput Kalaallit Nunaanni kommuninit avannarlerpaap
ilisarnatai: Avannaata Kommunia.

Illoqarfiit nunaqarfiillu 

Ilulissat 4.596 Uummannaq 1.310 Upernavik 1.060 Qaanaaq 535
Ilimanaq 58 Ikerasak 234 Aappilattoq 161 Qeqertat 25
Oqaatsut 29 (Illorsuit) 56 Kangersuatsiaq 146 Savissivik 56
Qeqertaq 113 Niaqornat 38 Kullorsuaq 431 Siorapaluk 40
Saqqaq 144 (Nuugaatsiaq) 37 Innaarsuit 169
Qaarsut 174 Naajat 55
Saattut 235 Nuussuaq 195
Ukkusissat 150 Tasiusaq 264
Nutaarmiut 44
Upernavik Kujalleq 196

Avannaata Kommuniani katillugit: 10.6511-t najugaqarput

1 innuttaasut amerlassussaat sept. 2017

Ilulissat 

Avannaata Kommuniata qitiusumik allaffeqarfia Ilulissaniippoq. Ilulissat kangerluat nunarsuarmi ilisimaneqartoq, UNESCO-p kingornussassatut allattorsimaffiutaani allassimavoq aamma nunaminertaq taanna ukiut tamaasa takornariarpassuarnit takusarneqartarpoq. Ilinniarfiit ukua illoqarfimmiipput: perorsaasunngorniat ilinniarfiat aamma Majoriaq.

Uummannaq 

Uummannap illoqarfia qeqertamiippoq taassumalu ilisarnaatigilluarpaa qaqqaq uummatitut isikkulik 1175 meterisut portussusilik illoqarfiup tunuatungaaniittoq. Uummannap eqqaani Qilakitsumi inuit arfineq-pingasut (8) toqugasut timaat asiunaveersakkatut isikkullit 1972-imi nassaarineqarput. Toqugasut timaat asiunaveersakkatut isikkullit 1475-imi toqusimasutut ullulerneqarput aamma taakkua Kalaallit Nunaanni katersugaasivissuarmi Nuummiittumi ullumikkut takornariaqarnerpaapput. Julliup inuata illu aasarsiortarfia aamma Uummannap eqqaaniippoq.

Upernavik 

Upernavik quligiluanik nunaqarfilik tassaavoq Avannaata Kommuniani illoqarfiit nunaqarfeqarnerpaartaat. Upernavimmi suluusalinnik mittarfik 900 meterisut takitigisoq (2000-imi atoqqaarfissiugaq) ippoq aamma timersortarfik (2006-imi atoqqaarfissiugaq) ippoq. Upernavik nunarsuarmi tamarmi katersugaasiviit avannarlerpaartaannik katersugaasiveqarpoq. Taassuma saniatigut meeqqat atuarfeqarpoq atuartut inaatalimmik.

Qaanaaq 

Qaanaaq tassaavoq Kalaallit Nunaanni illoqarfiit avannarlersaat. Qaanaami katersugaasivik paasisassarsiorluni angalatuup Knud Rasmussenip illorisimasaani illutaqarpoq. Sapaatip-akunneranut ataasiarluni timmisartumik Qaanaamukartoqartarpoq. Qaanaaq aprilip naajartorneraniit augustip naajartornerata tungaanut ulloq unnuarlu seqinnertarpoq.