Avannaata Kommunia: Tusagassiutinut nalunaarut. Inunnik toqqissisitsineq qanga illaruaatissanngortitsinerugami?

15. november 2017

Qaasuitsup Kommuniata avinnissaanut inatsimmi allaqqavoq sulisorisat Kommune Qeqertalimmut Avannaatalu Kommunianut agguaanneqassasut. Tamannalu pivoq kommunit pineqartut atorfilittaasa pisariaqartitaminnik oktoberip aallartilaarnerani inuttalersuimmata. Pineqartumi isumaqatigiissut malillugu atorfillit 41-t Kommune Qeqertallip tigorusullugit toqqarpai 62-illu Avannaata Kommunianut neqeroorfigineqarlutik. -  Pineqartunit arlallit Kommune Qeqertalimmut nuunnissaminnut itigartitsipput.

Akinissamut killissarititaasoq naammat Qaasuitsup Kommuniata allaffissuani malugisinnaavarput nuanniilliortorpassuaqartoq. Nuaanniilliortoqarpoq toqqissisimannginneqarlunilu.

Piffissami tamatumanerpiaq suli inuttalerneqanngitsunik sulisussanik pisariaqartitsivugut.

Kommune Qeqertalimmut nuunnissaminnut itigartitsisimasut atorfiit sorliit paasigatsigit suliffissaaruttussat pisariaqartissinnaasavut neqeroorfigaavut Avannaata Kommuniani atorfinissinnaassasut. Erseqqissaatigilarput tamakkeqqajarnagit neqeroorfigigatsigit, tigusin-naasavulli taamaallaat. Erseqqissassuarputtaaq akinissamut piffissaq killigititaasoq ullunik marlussunnik qaangiutereersoq aatsaat pineqartut neqeroorfigineqarmata, pisumilu matumani Qaasuitsup Kommunia malinnaatinneqarpoq.

Paasisinnaanngilluinnarparput SIKp siulittaasuata sulisunut suliffissaaruttussanut toqqissisitsiniarluta neqerooruteqarnerput illaruaatissiinertut taasinnaammagu.

Ajuusaarutigaarput suliffeeruttussat tamakkersinnaannginnatsigit aningaasatigut sinaakkusiussat killiliimmata.

Kommune Qeqertallip borgmesterissaata ajortisaarinnittumik pasinarsaarillunilu nipeqarluni uparuartuinera suliap matuma upernaarli aallartinneraniit oqaaserisartagaanut ilisarnaataginnarpoq.

Paasisinnaanngilarput Avannaata Kommunissaani inunnut amerlanerusunut toqqissisitsiniarluta iliuuseqarnerput ajortuliornermut saatinniarneqarmat.

 

Palle Jerimiassen                                                                                

Formand Overgangsudvalget                                                                

Avannaata Kommunia

 

 

Sivso Dorph

Adm. direktør

Avannaata Kommunia