Borgmesterip oqalugiaataa 2018

2. januar 2018

Isiginnaartut, tusarnaartut nunatsinni innuttaqativut tamassi ukiortaami pilluaritsi.

Neriuppunga tamassi ukiumut nutaamut iserluarsimassasusi, tamassilu ukiumi nutaami peqqinnermik iluanaarnermillu atugaqarnissassinnik kissaappassi.

Siullermik oqaatigerusuppara siorna Uummannap Sulluani pisimasoq assut eqqarsaatinniitikkakku. Eqqungaasimasut tamaasa eqqaamaqaakka. Pisoq alianartoq tamatta annertuumik attortitsiffigaarput. Misingissutsit imaannaanngitsut aqqusaarneqarput, sulilumi aamma tupinnanngitsumik taamaallutik. Siunissaq eqqarsaatigalugu eqqugaasimasut tamaasa ajunnginnerpaamik kissaappakka aammalu pisup pinerani ilaquttaminnik qaningisaminnillu annaasaqarsimasut qamannga pisumik misinginneqatigalugit. Eqqaaneqarnerat ataqqinartuuli.
Ikiuussimasorpassuit tamaasa minitaqarnanga qutsavigaakka. Uppernarsaqqipparput uagut kalaallit qanoq uatsinnut atatigaluta pisariaqartitsoqaleraangallu qanoq ataatsimut ikioqatigiissinnaatigaluta. Oqaaseq amingaraluarpoq: qujanaq.

Ukioq nutaaq 2018 aallartittoq uatsinnut avannaamiunut immikkuullarissuuvoq - kommunerput nutaarluinnaq, Avannaata Kommunia, ullumikkut atuutilerpoq. 
Avannaata Kommuniani innuttaasut Avannaata Kommuniani kommunalbestyrelse sinnerlugu pilluaqquakka angorusutartik piviusunngortimmassuk.

Innuttaasut piumasarisimavaat Qaasuitsup Kommunia avinneqassasoq, oqartussaaqataaneq annerusoq tusaaneqarnerunissarlu angorusullugu. Tamannalu piviusunngortinniarlugu alloriarnerit piviusunngortussanngorput.
Illoqarfinni sisamani aqutsisut pilersinneqalerput, aammalu nunaqarfinni aqutsisut akisussaaffilersorneqarlutik ingerlalissallutik.
Illoqarfinni Nunaqarfinnilu aqutsisut kommunalbestyrelsimit aaliangerneqarsimasumik missingersuuteqassapput namminneq aqutaminnik.
Sumiiffimmi ilusilersuinerit aqutsisut ingerlatarilissavaat.
Akisussaaffinnik tunniussuinerit akisussaaffilersuinerillu kommunalbestyrelsimit akuersaarneqareerput.
Innuttaasut kommunitsinni akuutinnerulernissaat qitiuvoq, innuttaasut oqartussaaqataasutut siunnerfilersueqataasutullu misigisimasut pilersikkusuppavut, angorusukkatsigu kommune tamatta piginneqataaffigisarput, kommune inuuffigissallugu, suliffigissallugu, najungaqarfigissallugulu pilerinartoq.
Oqartussaaqataanermik misigisimaneq uterteqqissavarput tamatta kivitseqatigiinnissarput suleqatigiissutigissagatsigu.

Kommunalbestyrelsimiit piumasaraarput innuttaasut kommunimut saaffiginnittut sullinneqarnermikkut malunnaatilimmik pitsanngorsaavigineqassasut. Innuttaasut saaffiginnereeraangamik misigisimasassapput ikiorneqarsimallutik - aammalu ingerlariaqqinnissaminnut siunnersorneqarsimasutut misigisimassallutik.

Kommunimi sulisut pinginnaasamikkut qaffassarneqassapput inuttullu nukittorsarneqarlutik, piffinnilu assingiinngitsuni suliassanut tunngatillugu annertunerusumik aaliangiisinnaassuseqalissallutik.

Suliffissaaleqineq sulisussaaleqinerlu tassaapput kommunitta iluani unammilligassatta ilaat.
Suliffeqarfiit, tunisassiorfiit, hotelit, sanaartornermik suliaqartut, pisiniarfiit, allaammi aalisartut, sulisussaminnik sumiiffinni tamangajanni ujartuipput. Ukiunilu kingullerni annertuumik avataanit suliartortunik atuineq ingerlanneqarpoq - aamma siunissaq eqqarsaatigalugu tamanna saneqqunneqarsinnaarpasinngilaq, assakaasut ingerlaavassappata pisariaqartippavut avataaniit suliartortartut.

Puiussanngilarpulli aamma suliffissaaleqisoqaratta, sulisinnaasullu tamaasa pisariaqartikkatsigit.
Avannaata Kommuniani suliffissaaleqisut immikkut ittumik iliuuseqarfiginiarlugit siunnerfigivarput.
Siusinaarluni pensionisiallit aamma pisortanit ikiorserneqartartut Inuussutissarsiornermut immikkoortortaqarfimmiit sullinneqalernissaat aaqqinneqarpoq sulisunngorsarneqarnissaat aqqutissiuunniarlugu.

Uagut avannaamiuusugut avatangiiserput atorlugu inuuvugut - ukiup nikerarneri tamaasa tulluussarfigisarlugit, piniagassat aalisakkallu ingerlaarneri nikerarnerilu tamatigut tulluussarfigisarlutigit. Tassuunakkut pikkorinnersaavugut, pinngortitaq unammillernarnerpaaq inuuffigaarput ajortortai ajunngitsortaalu tamaasa aqqusartarlutigit. Tulluussallaqqinnittali eqiasuinnittalu unammilligassanut nutaanut takkuttunut pitsaasumik ikaarsaariartittarpaatigut. Tassa siunissarput isumalluarnartutut kommunalbestyrelsimiit isigaarput.
Avatangiiserput inuussutigaarput, nerisaqarfigaarput, paarilluartariaqarparput, sumut tamaanga eqqaaneq qimallugu, avatangiisitta eqqiluittuunissaa pingaartittariaqarparput ataatsimoorfigalugu.

Kommunini tamani nunaqarfeqarnerpaavugut. Nunaqarfiit 23-it kommunitsinniipput.
Nalunaarusiat tamarmik oqariartorput nunaqarfiit ukiuni aggersuni ilaat matusussaassasut. Aamma oqariartorput nunaqarfiit inuussutissarsiornikkut periarfissagissaartut piorsarneqartut orniginartunngortinneqarnermikkut ingerlallualersinnaasut inuttusiartorlutillu.
Nunaqarfiit siunissaat pillugu oqallinneq pisariaqarpoq ingerlatissallutigu. Matooraanissamik siunnerfeqanngilagut, aamma anguniagaqanngilagut. Uanili angorusupparput nunaqarfiit siunissaat pillugit oqallinneq nunaqarfimmiut ilagalugit pilersinneqassasoq. Kisitsisit pissutsillu namminneq oqalluttuarput - piartortunik isigiginngitsuusarinninneq akisussaaffimmik qimarratiginninnerummat oqallinneq pisariaqartipparput.

Aalisarnikkut inuussutissarsiorneq tassaavoq kommunitsinni pingaarnertut inuussutissarsiuterput sulilu ukiuni aggersuni pingaarnertut suli inuussutissarsiutissarput. Peqassuseq mianeralugu piorsaanerup pilersaarusiukkamik ingerlanneqarnissaa pisussaaffigaarput.
Aalisagaq ataasiinnaq aallaavigalugu ukiorpassuarni aalisarnikkut ingerlatsisoqarpoq. 2017-imili Ilulissat eqqaanni tamatta tupassutigisatsinnik qaleralinniarneq malunnaatilimmik kinguariataarpoq. Eqeersarneqarpugut eqqarsalersinneqarlutalu, siunissamilu aalisarnerup qanoq ingerlanneqarnissaa pillugu Aalisarnermut Naalakkersuisoqarfik aamma aalisartut peqatigiiffii aalisartullumi ilagalugit aaqqiissutaasinnaasunik suleqatigiilluta pilersaarusiornerit aallartereerpavut.
Qujanartumik saarullik aamma takkuteqqippoq aalisartullu tulluussarluallaqqinnertik atorlugu saarullik iluaqutigillualereerpaat.
Aalisarfiit nutaat Qimusseriarsuarmiittut aamma atorluarnissaat pillugu nalunaarusiat massakkut passuppavut periarfissat nutaat innuttaasutsinnut iluaqutinngortinniarlugit.

Takornariaqarneq annertusaqqissallugu periarfissat nutaat annertuut uaneralaamiipput, taamaattumillu nunaqavissut peqataatinnerunissaat aqqutissiuutissuarput.
Ilulissani mittarfiup tallinnginnerani annertuumik pilersaarusiornerit ingerlatissavavut takornarissat sumiiffinni allani aamma iluaqutaalerniassammata.

Ukiuni tulliuttuni sanaartugassarpassuit sillimaffiginiarlugit massakkut sulisitsisut qanimut oqaloqatigaavut, qanittukkullu sanaartorneq pillugu isumasioqatigiisitsinissaq pisussaq pilersaarusiorparput.

Meeqqat inuusuttullu atugaat ataatsimoorluta pitsanngorsarnissaannut pisussaaffeqarpugut. Meeqqanut inuusuttunullu suliniutit tamarmik naleqartitat pilersaarutillu malillugit ataqatigiissakkamik ingerlanneqassapput.
Sunngiffimmi sammisassat, meeqqeriveqarnerit, atuarfeqarfik, atuarunnaareernerup kingornatigut alloriaqqinnissat tamarmik ataqatigiissarneqarlutik immikkoortortaqarfiit suuneri apeqqutaatinnagit suleqatigiinnikkut kivinneqarnissaat suleqatigiissutigineqassapput.
Meeqqat inuusuttullu siunissami unammilligassanut pitsaasunik sakkulersorneqarnissaat kommunalbestyrelsip pingaarnersiuinermini pingaarnerpaatippaa.
Meerartatta atugaat  eqqarsaatigalugit sanngiiffeqarpugut.
Qujanartumilli ukiuni kingullerni annertuumik oqallinnerit iliuuseqarniarnerillu ingerlanneqarput. Nassuerutigisariaqarparpulli ilaqaratta meeqqaminnik paarsinerluttunik, taakkuali iliuuseqarfigalugit aamma paarsilluartunngortissinnaavavut. Tamattami tamanna anguniarusupparput. Nalunngilarput meerartaarutta nammineerluinnarluta meeqqap perorsarneqarneranut atugaasalu pitsaasuunissaannut akisussaasuulluta.
Upperaarput inuit namminneq sumiiffimminni pissutsinik nalunngisaqarluarnertik tunngavigalugu allannguinissamut qanimut suleqataanermikkut annertuumik nikisitseqaataarusussuseqartut.
Nukiit pingisavut tamaasa atorluarnerisigut nikisitsisinnaaneq siunnerfigaarput tamattalu akisussaasuunerput puiussanngilarput. Nipangiussiinnarneq pissutsinik allannguerusunnginnermik akuersaarneruvoq.
Manna iluatsillugu qutsavigerusuppakka meerartatta pitsaasumik siunissaqarnissaat pillugu sulisuvut, aamma ulluinnarni namminneq piumassusertik atorlugu meeqqanut sammisassaqartitsisut.

Utoqqaat qujanartumik amerliartorput. Inuunertusiartorpugut, peqqinnarnerusumik inuuneqaleriartornerup tamanna uppernarsaatissaraa. Unammillernartoqarporli, utoqqaat illui amerlanernik, puiortunngorsimasut inissaannik utoqqaallu sapinnginnerusut inissaannik amingaateqarnerput annertusiarpoq, siunissamilu pilersaarusiornitsinni tamanna eqqumaffiginerusariaqarparput.

Massakkut inissisimaffitsinni ilaqarpugut inunnik kivinniagassatsinnik.
Inuit uani eqqartorpavut allatulli ataqqineqarnissamik akuerisaanissamik uatsitulli pisariaqartitsisut. Ikiorneqarusupput, alloriarnissaannullu iliuuseqarnissarput pisariaqarpoq pinngitsooratalu iliuuseqarfigissavavut.
Tikkuartuinerit nikassaanerillu pissutsinik pitsanngoriartitsiunnanngillat, ajornerulersitsiinnartarput, akuersaarlunili sullissineq atorlugu aatsaat nikeriartitsisinnaavugut.
Apeqqutaanngilaq qanoq amerlatiginersugut imaluunniit qanoq ikitsiginersugut - apeqqutaavoq uatsinnut qanoq inuttut pissusilersorfiginersugut.

Piviusunngortitsissaguttalu pingaarnertut nukiit pingisatta, tassa innuttaasut, sakkussaannik pitsaasunik tuniorartariaqarpavut.
Inuit pinginnaasaat qaffassarlugit pinginnaasallu pioreersut atorluarlugit kommunitsinni kivitseqatigiinneq anersaaralugu suleqatigiilluta kommunerput tamanut orniginartunngortissuarput inuuffigissallugulu pilerinartunngortillugu.

Ineriartortitsinermut kivitseqataaneq massakkumiit peqataaffigisariaqarparput massakkut inuttut nammineersinnaasutut  akisussaaffimmillu tingusisinnaasutut pissusilersornitsigut, namminersulivinnissamut tunngavissat akisussaaqataaffigalugit ilusilersueqataaffigalutigit.

Kommunerput nutaaq tassaavoq periarfissat kommuniat.

Aningaasarsiornikkut periarfissarpassuaqarpoq. Isumatusaarnikkut pilersaarusiorluarnikkullu periarfissanik piviusunngortitsinerit ingerlatissavavut. Ukioq siulleq mianersortumik aallartinnissarput kommunalbestyrelsimi aaliangiupparput. Tunngavissavut isumannaareerutsigit nutaaliornerit ingerlatilissavavut.
Siunissarput qaamasuuvoq. Kommunalbestyrelsimiillu siunissamut isumalluarluta innuttaasut tamaasa kivitseqatiginissamut suleqatigiinnissamullu peqatiseraavut.

Qujanaq.

In.In.
Palle Jerimiassen
Borgmesteri
Avannaata Kommunia

YouTube: https://youtu.be/xgQWOIuxI0w