Kommunep pilersaarutaanut tapiliussaq nr.48 ”Sermermiut Aqqutaa”, Ilulissani nutaamik qitiusoqarfiliassap, pisortatigoortumik nalunaarutigineqarnera

22. januar 2018

Kommunep pilersaarutaanut tapiliussaq nr.48 sumiiffiup ilaanut C21 inaarutaasumik akuerineqarpoq 18.01.2018. Kommunep pilersaarutaanut tapiliussaq pisortatigoortumik nalunaarutigineqarpoq ulloq 22.01.2018, ullorlu tassangaanniik kommunep pilersaarutaanut tapiliussaq eqqartuussiveqarnikkut atuutilerluni.

Kommunimi pilersaarummut tapiliussap siunertaa:
Sumiiffimmut aalajangersakkat pingaarnerit sukumiisumillu aalajangersakkat tamaani illoqarfiup qeqqani aaqqissuisinnaalluni imalt.sanaartorsinnaalluni ilaqutariinnut illulianik, sulisunut inissianik, inuussutissarsiorfinnik, niuvertarfinnik, neriniartarfinnik aamma illoqarfiup qeqqani atuuffinnik assigiinngitsunik.

Kommunep pilersaarutaanut tapiliussaq tusarniutaanikuuvoq sap.akunn.8-ni kiisalu sap.akunn.2-ni ilassutitut tusarniutaaffiusuni sanaartorfissat nutaat marluk ilanngunnerini. Tusarniaaffittut piffissaliussami innuttaasut, suliffeqarfiit il.il. periarfissinneqarput akerliunernik, oqaaseqaatinik allannguutissatullu siunnersuutinik saqqummiinissaannut.

Sanaartorfissat atorneqanngitsut
Matumuuna ilanngullugu nalunaarutigineqassaaq, sanaartorfissanut nunaminertanik qinnuteqartoqarsin-naammat. Sanaartorfissat 1-9 sanaartorfiusi8nnaasutut ussassaarutigineqarput sapaatit akunnerini pingasuni kommunemi pilersaarusiornermi aalajangersakkani §5.2 naapertorlugu, inissianut sanaartorfissat aamma peqatigiiffeqarnikkut siunnertallit.

Sanaartorfissat 10-11 sapaatit akunnerini 6-ni ussassaarutaassapput kommunemi pilersaarusiornermi aalajangersakkani §5.3 naapertorlugu, inuussutissarsiorfinnut, paaqqinnittarfinnut aammalu teknikkikkut atortutut siunertalinnut sanaartorfissatut.

Nunaminertaq sanaartorfiusinnaasoq sanaartorfigineqanngitsorli nunaminertamik atuisinnaanermut qinnuteqarfigisinnaavat NunaGIS aqqutigalugu aamma kommunip nittartagaa aqqutigalugu qinnuteqarluni immersugassaq aasinnarlugu immersorneqassaaq, uaniittoq: http://www.avannaata.gl. Inummit imaluunniit suliffeqarfimmit ataatsimit qinnuteqaat ataasiinnaq immersoqqusaavoq, inuttut ataasiinnartut allassimasussaq aamma inatsisit malillugit ataasiinnarmik atuarneqarsinnaassaaq. Qinnuteqaatit tamarmik pappiliartaat nassiunneqartut aallaavigalugit nalilersorneqarumaarput. Nunaminertaq sanaartorfissaq qinnuteqartunit arlalinnit assigiimmik akuersivigineqarsinnaatillugu kommuni akuersissummik tunniussisinnaajumalluni makitsisariaqassaaq.

Qinnuteqaatit tamarmik makkunannga imaqassapput:
1. Sanaartugassap ilusissaatut siunnersuut, sanaartukkap inissisimaffissaanik, isikkussaanik atortullu suut atorlugit sananeqarnissaanik nassuiaatitalik.
2. Sanaartukkap sumut atorneqarnissaanik paasissutissat.
3. Teknikkikkut atortut ikkusuunneqartussat pillugit paasissutissat.
4. Aningaasaqarneq pillugu paasissutissat, qinnuteqaatip piviusunngortitsisinnaaneranik uppernarsaatitut atorneqartoq.

Piffissaliussat aamma suliat pilersaarutaat:
22.01.18: Nal. 08:00 –miit nunaminertanut qinnuteqaasiortoqarsinnaalissaaq.
12.02.18: Nal. 16:00 sanaartorfissanut 1 – 9-nut nunaminertanut qinnuteqaatit siulliit tigoorarneri matussapput.
05.03.18: Nal. 16:00 Sanaartorfissanut 10 – 11-nut qinnuteqaatit siulliit matussapput.

Tamatuma kingorna sanaartorfissat suli pineqarsimanngippata sukkulluunniit qinnuteqaasiornerit ingerlanneqarsinnaalissapput.
Tamatuma kingorna sanaartorfissaq suli sanaartorfigineqarsimassanngippat nunaminertamik atuisinnaanermut qinnuteqaatit qaqugukkulluunniit qinnutigineqarsinnaapput.

Ilitsersuut
Siunnersuutit ilitsersuutillu Pilersaarusiornermut immikkoortortaqarfimmut oqarasuaat: 947800 imaluunniit mail-imut: plan@avannaata.gl. saaffiginnilluni pissarsiarineqarsinnaapput.

KPT48.pdf