Inuusuttut aallarnisaasut juunimi Nuummi naapinnitinneqarnissaat

6. marts 2018

Innovasjon Norge aammalu Innovation Center Iceland suleqatigalugit, ukioq manna 2018-imi, Greenland Business aaqqissugaanik Nuummi, ulluni 1. aamma 2. juuni 2018, NORA REGION CONFERENCE 2018 ingerlanneqassaaq.

Uani aaqqissuussinermi nunani avannarlerni inuussuttut, aallarnisaasutut atatillugu isumassarsioqatigiisillugit, peqataasussatut aallaavigineqarput. Kalaallit nunaanniit 4-t (Nuup avataani), Norge-miit 3-t, Savalimmiuniit 3-t, kiisalu Island-imiit 3-t  naapeqatigiinnermi peqataasussatut periarfissinneqarlutik.

Ulloq siulleq tallimanngornermi 1. juuni inuussuttunut, imminut nappassinnaasumik ineriartortitsinissat qulequtaralugu, aallarnisaasutut isumassarsiorfittut unammisitsinermik  ingerlanneqassooq. Aqaguani ajugaasumik toqqaasoqassalluni.

Ulloq taanna aamma, meeqqat ulluat eqqorlugu, Katuami immikkut sammisassat assigiinngitsut arfineq pingasut meeqqanut sammisassaqartitsivigineqassapput, ilaatigut Mindstorms-it atorlugit sammisaqartitsisoqassalluni.

Ullup aappaani arfininngornermi 2. juuni aallarnisaasinnaanermut tunngatillugu isumasioqatigiinneq aammalu workshop-it assigiinngitsut ingerlanneqassapput.

Avannaata Kommunia ingerlanneqartussamut atatillugu inuussuttut 25-iniit 35-inut ukiullit soqutiginnissinnaasut sumiiffinni inuussutissarsiornermut siunnersortinut saaffiginnissinnaapput.

Isumasioqatigiinnermi avataaniit tikittut saqqumiisartussaammata tuluit qallunaallu oqaasiinik paasilluarsinnaaneq pisariaqarsinnaavoq.

Soqutiginnikkuit sumiiffimmi inuussutissarsiornermut siunnersortit attavigalugit, sooq peqataarusunerlutit tunngavilersorlugu, saaffiginnissinnaavutit.

Peqataanissamut inissat killeqarmata peqataasussatut nalunaarnikut Avannaata Kommunianit kikkut peqataatinneqassanersut nalilersuinikkut aaliagiisoqarumaarpoq.

Saaffigineqarsinnaasut:
Qaanaaq: Arruttaq Qujaukitsoq – tlf.: 97 28 07
Upernavik: Nikolaj Jensen – tlf.: 96 48 12
Uummannaq: Pipaluk M Kruse – tlf.: 95 45 21
Ilulissat: Nguutiu Niels Kristensen – tlf.: 94 79 83

Isumasioqatigiinneq pillugu sukumiinerusumik uani paasisaqarsinnaavutit: https://www.facebook.com/NORAinnovation2018