John-ip issiavia

24. maj 2018

Ilulissat aamma Fredericia-p 50-iliillutik nalliuttorsiutigineqarneranut atatillugu illoqarfimmi issiaartarfiit ilaasa ilisarnaaserlugu atserneqarnissaa Avannaata Kommuniata aalajangiuppaa. Tamanna Fredericia-p Kommuniani sulilluarsimasut ilaannut John Bech Hansen-imut ataqqiniutitut iliuuseqarnertut isigineqassaaq.

John Bech Hansen Fredericia-p Kommuniani Kalaallit Nunaat pillugu ataatsimiititaliami siulittaasuuvoq, ukiorpassuarnilu meeqqat Ilulissaneersut Fredericia-mi eqqaanilu atuarnerminni pitsaasumik atugaqarnissaannut sulissutiginnissimalluni.

Inger Degn, Ilulissani ilinniartitsisuusoq meeqqaallu Ilulissaneersut Fredericia-miinneraani ataqatigiissaarisuusoq ima oqaaseqarpoq:

- ”John maani Ilulissani sulinikuuvoq maaninnerminilu ujaqqamik eqqaassutissiaq takuniartuartarpaa taassumalu saniani issiavimmut ingilluni isikkivik aliannaarsaarutigisarlugu. Angerlareernermi kingorna issiavini maqaasillugu eqqaajuartarpaa. Aamma maanga Ilulissanut tikittoqaraangat taakkununnga oqaatigisarpara taanna tassaammat John-ip issiavia, taamaattumillu John-ip issiavianik ateqarpoq.”

Angut attortissamasoq nuannaaqisorli tupaallatsinneqarpoq Avannaata Kommunianik issiavimmi allagartaq takugamiuk: [John-ip issiavia – Fredericia].

Allagartamik saqqummiinermi Avannaata Kommunianiit sinniisut arlaqartut peqataapput: Kommunalbestyrelsimi ilaasortaq Jørgen Kristensen, Peroriartortitsinermut Ingerlatsivimmi Pisortaq Hans Eriksen, Ilinniartitsisoq Inger Degn aamma Sunngiffimmi sammisassaqartitsinermi Pisortaq Ane Solveig Hansen.