Ilulissani eqqakkat 50 tons katersorneqartut

20. juli 2018

Maj-ip naalerneraniilli aput aammat kommunimi sullivimmi atortussaasivimmi sulisut, innuttaasut aamma Ilulissani suliffeqarfiit eqqiluitsitsiniarlutik ulappussimapput. Illoqarfimmi sumi tamani eqqakkat assigiinngitsorpassuit takussaapput, eqqiluisaarnissaq tamatta akisussaaffigaarput, taamaattumillu kommuni eqqakkanik katersiniarluni arlalinnik suliniuteqarpoq, makku eqqaaneqarsinnaapput:

- Kommunip atortussaasiviani sulisut eqqiluitsitsinermut imaluunniit saliinermut atatillugu apulli aammat suliffissaaleqisut suleqatigalugit suliaqarsimapput
- Juni-p qiteqqunnerani Saligaatsumut, suliffeqarfiit saliinermut ullorititaanni Kommuni CSR Greenland suleqatigalugu aaqqissuussamik ingerlatsipput
- Innuttaasut saleersuarnerat, upernaakkut saliinermik taaneqartartoq. Tamanna pivoq juni-p qiteqqunnerani.
- Talittarfimmi atuisut aamma soqutigisaqaqatigiit talittarfimmut attuumassutillit saleersuarnerat
- Illoqarfimmi upalungaarsimasut pallet-inik katersipput

Kommunip atortussaasiviani makku nalunaarsorneqarput:

- Containerit 20 fods-itut takitigisut aqqanileriarlutik imaarneqarput
- Containerit 15 fods-itut takitigisut arfineq marloriarlutik imaarneqarput
- Containerit 12 fods-itut takitigisut aqqanileriarlutik imaarneqarput
- Eqqakkat 700 m3-it missaanniittut aaneqarput
- Biili usisaat illoqarfimmi eqqakkanik annertuunik ullut tamaasa ullaakut katersisarpoq
- Biili usisaat eqqakkanik ullup ingerlanerani sulisunit aamma suliffissarsiortunit katersorneqarsimasunik katersisarpoq

Kommunip atortussaasiviata eqqoriarpaa eqqakkat 50 tons missaanniittut katersorneqarsimanissaat. Maanna biilit atorunnaarnikut iginneqarnissaat siunertaralugu kommunimit katersorneqassapput. Illoqarfimmi biilit atorunnaarnikut 50 missaanniittut kommunimit nalunaarsorneqarput. Tamatuma saniatigut illoqarfimmi umiatsiakut kiisalu pigisat allat annertuut iginneqarnissaat siunertaralugu kommunimit katersorneqassapput. Eqqagassat tamakku maanna ujartorneqarput, innuttaasullu qisuariarnissamut sapaatip akunnerinik pingasunik piffissalerlugit periarfissinneqarput, qulaani taaneqartut kommunip sulisuinit aaneqassanngippata.
Eqqiluisaarneq kommunimit immikkut isiginiarneqarpoq nukippassuillumi tamatumunnga atorneqarlutik. Kommunalbestyrelsi siunertamut annertuumik aningaasaliissuteqarpoq.
Suliassap naammassiniarneqarneranut taamaalilluni illoqarfipput Ilulissat eqqiluitsuusinnaaqqullugu kikkut tamaasa peqataasimasut Teknikkikkut ingerlatsiviup nersualaarumavai. Taamaattorli illoqarfimmi eqqiluitsuutisinermut/saliinermut atatillugu Ingerlatsivik nammineq kajumissutsimikkut suleqataarusuttunik maqaasisaqarpoq, tassami suliassaq kommunip kisimiilluni ingerlattuaannarsinnaanngimmagu.
Aasap ingerlanerani kommunip atortussaasivia illoqarfimmik ataavartumik saliisassaaq aamma aasap naajartulernerani innuttaasut peqatigalugit saliinissaq naatsorsuutigineqarpoq.

in.in.
Mathias Mølgaard
Teknikkikkut ataqatigiissaarisoq
Teknikkikkut Ingerlatsivik
Avannaata Kommunia