Inatsisartut mittarfissualiornissamut aappassaanneerillutik oqallinnerminni mittarfissuassat sananeqarnissaannut akuersaarnerat nunatta siunissaanut qaamanermik ikitsivoq

2. november 2018

Nunatsinni mittarfissuit sananeqarnissaannut tunngaviusumik isummernermiit ukiorpaalunnguit qaangiuttullu kiisami isummertoqarnera nunatta siunissaanut isumallualersitsivoq.

Mittarfissuit suliffippassuarnik nunatsinnut kinguneqartussaapput, minnerunngitsumik nunatsinni takornariaqarnermik inuussutissarsiutilinnut. Nunatta aningaasarsiornikkut ingerlatsinermini inuussutissarsiutinik isaatitsinissamut periarfissanik nutaanik takkuttoqarnissaa pisariaqarteqaa. Mittarfissuartaassavut aningaasarsiornikkut ineriartoqqinnissatsinnut periarfissiilluassapput. Isaatitsinerulernissamut periarfissinneqartussat tassaasussapput akunnittarfiutillit, neriniartarfiutillit, takornarialerinermik ingerlatsiviit allat, sorpassuillu taakku nassatarisaattut pilersinneqarsinnaasut.

Taakkuinnaanngillalli pitsaanerusumik atugassaqartinneqalertussat. Nunarsuatsinnut angalaniaraangatta periarfissanik nutaanik periarfissinneqassuugut. Ukiualunnguit qaangiuppata nunarsuatsinni mittarfissuaqarfiusunut toqqaannartumik attaveqalernissaq periarfissanik nutaarluinnarnik nunatsinniit angalasartunut ammaasussaavoq. Nunatsinniit avammut, tassa nunanut allanut angalanissatsinni Air Greenland kisiat isumalluutigiunnaassuarput. Timmisartuussinermik ingerlatsisorpassuit allat aamma periarfissaalissapput, apeqqutaaginnalissalluni nunarsuatsinni sumut ingerlariaqqikkusugut. Periarfissap taassuma sulinngiffeqarluta nunanut allanut angalasinnaanissatsinnut akikinnerusumik angalanissamut periarfississuaatigut. Nunarsuarmioqataasutut misigisimanerput annertusiallaqqissooq.

Mittarfissualiornissamut Inatsisartut ullumikkut aaliangernerat nuannaarutigaarput inuussutissarsiutilinnut, innuttaasunut siunissamullu qaamasumik pilersitsimmat.

Palle Jerimiassen
Borgmesteri