Avannaata Kommunia aamma KAK meeqqat inuusuttullu akornanni ataatsimoornermik nukittorsaaneq pillugu ukiuni pingasuni suleqatigiinnissamik isumaqatigiissuteqarput
Avannaata Kommunia Kalaallit Arsaattartut Kattuffiat (KAK) peqatigalugu ukiuni pingasuni suleqatigiinnissamik nutaamik isumaqatigiissuteqarpoq, taanna kommunimi arsaattartut futsal-illu klubbiinik nukittorsaanissamik siunertaqarpoq, klubservice aamma sungiusaasartut ilinniartitaanerat aqqutigalugu.
Suleqatigiinneq siunertaqarpoq ersarissumik: meeqqat inuusuttullu pitsaasunik atugassaqarnissaat qulakkeerneqassaaq nukittuumik timersornermi ataatsimoorfinnik pilersitsinikkut. Arsarneq futsal-ilu pingaarutilittut atorneqassapput pinaveersaartitsinermi, atugarissaarnermut, peqqissutsimut ataatsimoornermullu iluaqutaasumik – sunngiffimmi sammisassaqartitsinermut allanut sanilliunneqarsinnaanngitsumik.
Isumaqatigiissut naapertorlugu Avannaata Kommunia klubservicemut aningaasatigut tapersiissaaq ukiuni pingasuni. Tamatuma saniatigut kommunip KAK-p sungiusaasartuinut angalanermut najugaqartitsinermullu aningaasartuutit akilissavai, sungiusaasartut najukkaniittut ilinniartinneqarnissaat siunertaralugu. Siunertaq tassaavoq klubbinut ataavartunik, toqqissisimanartunik pitsaasumillu aaqqissuussamik avatangiisinik pilersitsineq.
“Peqatigiiffiit nukittuut meeqqatsinnut inuusuttatsinnullu tunniussinnaasatta pitsaanerpaat ilagaat. Isumaqatigiissut manna aqqutigalugu ataatsimoorfiit nukittorsarpagut, ajornartorsiutinik pinaveersaartitsisut kiisalu ineriartortitsinermut sinaakkutissanik pitsaasunik pilersitsisut,” oqarpoq Kulturimut, Ilinniartitaanermut Meeqqerivinnullu Ataatsimiititaliap siulittaasua, Paarnannguaq Mathiassen.
KAK-mi isumaqatigiissut pingaarutilittut isigineqarpoq, klubbit ulluinnarni ingerlatsinerannik kiisalu kajumissutsimik suliallit kommunimi tamarmiittut nukittorsaanermik tapersersuisoq.
“Klubbit pitsaanerusumik aaqqissuunneqaraangata sungiusaasartullu pitsaanerusumik ilinniartinneqaraangata, meeqqat inuusuttullu toqqissisimanartumik ineriartortitsinermullu iluaqutaasumik avatangiiseqalersarput. Avannaata Kommunia peqatigalugu suleqatigiinneq periarfissiivoq sivisuumik isiginnilluni siunertaqarluarlunilu sulinissamut,” oqarpoq KAK-p siulittaasua, Kenneth Kleist.
Isumaqatigiissut ukiuni pingasuni atuutissaaq, klubbservice, aaqqissuussaanermut tapersiineq kiisalu kommunimi arsaattartut futsal-illu klubbiini sungiusaasartut ilinniartitaanerat ilanngullugit.