Ammasumik allagaq
Ammasumik eqqakkanik ikuallaanissamut immikkut ittumik qinnuteqaat
Sakio Fleischer, Teknikkimut Ataatsimiititaliami siulittaasoq, Avannaata Kommunia
Avannaata Kommunia eqqakkanik ikuallaanissamut immikkut ittumik akuersissummik ulloq 18. marts 2026 qinnuteqarnikuuvoq. Taassumap siornatingut immikkut ittumik akuersissut Avannaata Kommunianut kingusinaangaatsiarluni tunniunneqarnikuuvoq. Tassa akuersissut 1. februar 2026 - 30. april 2026 atuutsinneqartoq Avannaata Kommunianut 9. marts 2026 nassiunneqarluni. Piffissami 1. februar 2026 – 9. marts 2026 inoqarfinni eqqakkat amiliartupiloornikuupput, eqqangassalerisunullu annertuumik suliakkiinikuullutik.
Kommunip immikkut ittumik akuersissutaata atuukkunnaarnissaanut siusissukkut Teknikkimut ingerlatsivik Naalakkersuisoqarfimmut qinnuteqaammik ingerlatsinikuuvoq. Qinnuteqaat 18. marts 2026 nassiunneqarluni, taannalu suli akissuteqarfingineqarani. Naalakkersuisoqarfiup nalunaarutingivaa Naalakkersuisup atsiornera kisimi utaqqisaasoq. Taannalu ilisimatitsissutaat sivittortumik nassuiaatingineqattaarluni.
Aasaanerani aalisarneq sanaartornerlu avannaani annertulisarpoq. Annertunerulerneratalu malitsingisarlugu eqqakkat annertunerulerneri. Massakkumut inoqarfinni amerlanerpaani ajornartorsiut malunnaatilimmik annertusiartorpoq. Innuttaasunullu akornutaanera annertusiartorluni.
Kommuni eqqangassalerinermut pilersaaruteqarpoq malitaminik, pilersaarutillu naammassinissaanut suliassat suli annertullutik. Eqqangassalerinermi nalunaarutip piumasaqaatai naammassinissaanut aningaasartuutit annertuut kommunip ukiumut atortarpai, tassa ukiumut 20-30 mio. kr. atorneqartarlutik. Ukiunilu tulliuttuni suli ammasumik ikuallaanissamut pisariaqartitsineq atuuttussaassalluni, eqqangassalerinermi pittanngorsaatit naammassinissaannut.
Silap maanna aasarnerani kissarulunnerani eqqaavissuit mikiarlutik tippanneranni ajornartorsiutaavoq aammalu niviugappassuit ajornartorsiutaallutik.
Akuerineqarnissaq utaqqikatapparput iliuuseqarnissaq pisariaqarmat piaartumik akineqarnissarput piumasaraarput.