Ilaannikkut aaqqiissut allaffimmi nassaarineqarsinnaasanngilaq – ilaqutariilli namminneq nerisarfianni.
Meeraq atugarissaanngikkaangami, atuanngikulasaruni imaluunniit ilaqutariit ajornakusoortumi inissisimatillugit inuit meeqqamik ilisarisimanninnerpaat amerlanertigut taakkuusartut aaqqiissutissanik annikittunnguanik, kisianni annertuumik pitsaasumik sunniuteqarsinnaasunik ilisimasallit.
Tamanna tassaavoq Ilaqutariinni aqqutissioqatigiinnermut tunngavigineqartoq, taannalu maanna Avannaata Kommunia tamakkerlugu aalajangersimasumik atorneqalissaaq.
Ukiuni arlaqartuni siunertalimmik suliaqareernerup ilinniagaqareernerullu kingorna kommunip illoqarfiini tamani ”ataqatigiissaarisunik” pilersitsisoqarnikuuvoq, aamma suliassaqarfimmi sulisut ilaqutariinnik aqqutissioqatigiinnernik pilersaarusiornissaminnik suliaqarnissaminnillu ilinniartinneqarnikuupput. Suleriuserlu tamanna kommunip meeqqanut, inuusuttunut ilaqutariinnullu suliniuteqartarneranut aalajangersimasumik ilanngunneqarpoq.
Ilaqutariit aaqqiissummi ilaapput
Ilaqutariinnik aqqutissioqatigiinnermi kommunimi kisimiilluni aaqqiissummik ujarlertanngilaq.
Meeraq, ilaqutariit aamma attaveqaataat suliassaqarfimmi sulisoq peqatigalugu naapittarput unammillernartoq eqqartorniarlugu. Ilaqutariit pisumik eqqartuisarput meeqqallu pitsaanerpaamik ikiorneqarnissaanut siunnersuutinik ujarlertarlutik. Meeraq aamma ilaqutariinnik aqqutissioqatigiinnermut tapersersorteqartarput taakkulu nalusanngilaat meeraq qanoq oqariartuuteqarnersoq aamma ilaqutariinnut ataatsimiisitsinermi tusaaneqarnissaanik ikiuisarpoq.
Isumaqatigiissutigineqartut annikitsuaraasinnaasarput ilaqutariit namminneerlutik takusinnaasaat.
Meeraq assersuutigalugu atuanngikulasarpoq. Ilaqutariinnik aqqutissioqatigiinnerup ingerlanerani ilaqutariit namminneerlutik aaqqiissutinik annikitsunik aalajangersimasunik isumassarsissapput: Meeqqap innannginnermini angerlarnissaanut atsaasoq isumaginnippoq, ilaqutariit ataatsimut ullaakkorsiortarnissartik isumaqatigiissutigaat aamma qatanngutaasup meeqqap ullaakkut atuariartornissaminut bussernissaanut ikiuutaavoq. Suliniuteeqqat nutaat annikitsut kinguneranik meeraq ullut tamaasa atuariartortalerpoq.
Kalaallit Nunaanniit aamma nunanit allanit misilittakkat takutippaat ilaqutariinnik aqqutissioqatigiinnerni aaqqiissutaasussat ataavarnerusut pilersinneqartartut. Ilaqutariit tusaaneqartarput akisussaaffimmik tiguseqataasarput aamma isumaqatigiissutitut pilersinneqartunut piginneqataasutut misigisarput.
Kommunimi piginnaanngorsaanerit tamarmik ingerlanneqarput
2023-miilli Avannaata Kommunia siusissukkut suliniuteqarnerit taamaattut neqeroorutigisalerniarlugit piginnaanngorsaaqqinnerit pisariaqartinneqartut naammassiniarlugit suliaqarnikuuvoq.
Suliassaqarfinni arlalinni sulisut maannakkut aallarnisaasussatut aamma najukkami suliaqartartussatut ilinniagaqarsimalerput, aamma kommunip illoqarfiini tamani ataqatigiissaarilluni suliaqarnerit aallartinnikuupput.
Ilulissani ataqatigiissaarisut marluk atorfinitsinneqarnikuupput taakkulu ilaqutariinnik aqqutissioqatigiinnernik ataqatigiissaarillutillu illoqarfinni allani suleqatitik suliatigut siunersiorlugit, workshop-ertillugit aamma piginnaasaannik ineriartortillugit ikorfartortarpaat.
Tamatuma saniatigut kommuni nammineerluni ilinniartitsisartussanik pilersitsinikuuvoq tassanilu Mike-Lars, Sofie, Paninnguaq aamma Nielsine Ilulissani, Uummannami aamma Qaanaami ilinniartitsinernik suliaqartarput. Upernavimmi ilinniartitsineq naammassineqarnikuuvoq Isumaginninnermut aqutsisoqarfiup ikorfartuineratigut.
Ilinniartitsinermi suliamut tunngatillugu saqqummiussinerit, sungiusarnerit, piviusuusaartitsinerit misilittakkanik avitseqatigiissuteqarnerit aamma sulianik aalajangersimasunik suliaqarnerit ingerlanneqarnikuupput, taamaasillutik sulisut periutsip sulinerminni atulernissaanut sakkussaqarniassammata.
Siunissami meeqqat pillugit
Najukkami aaqqissuussisartut, ilinniartitsisartut aamma suliatigut attaveqatigiinnerit nukittuut aqqutigalugit ilaqutariinnik aqqutissioqatigiisitsisarneq Avannaata Kommuniani meeqqanut, inuusuttunut aamma ilaqutariinnut suliaqarnermi ilaallluinnalernikuuvoq.
Kommunip sulisut, aqutsisut suleqataasullu suliniuteqarnermut iluatsitseqataasut annertuumik qutsavigerusuppai.
Meeraq qitiutillugu – barnet i centrum.
