Uummannami ilinniartitsisumut illu nutaaq naammassineqarpoq. Inissiaq illoqarfiup immikkoortortaani nutaanerusumiippoq, Avannaata Kommuniata 2017-imi tassaarsuaqarnerata kingorna sanaartorfigilersimasaani.
Tassaarsuaq pingaartumik Nuugaatsiami Illorsuanilu annertuumik eqquivoq, ilaqutariillu arlallit sumiiffinnit taakkunannga Uummannamut nuullutik ulluinnarni inuunertik nutaamik aallartittariaqarsimavaat. Tamatuma kingorna illoqarfiup immikkoortortaani tamaani illunik amerlasuunik sanasoqarsimavoq, ineriartortitsinerlu suli ingerlanneqarpoq.
Uummannami illu nutaaq aamma kommunip meeqqat atuarfiinut ilinniartitsisunik pissarsiniarnissamut periarfissanik suli pitsaanerusunik pilersitsinissamik suliaqarneranut ilaavoq.
Pilersaarutit naapertorlugit Ikerasammi ilinniartitsisumut illu nutaaq ukioq manna kingusinnerusukkut naammassineqassaaq, aamma Qaarsuni Ukkusissanilu ilinniartitsisunut illut nutaat 2027-mi sananeqarnerat aallartinneqassaaq.
Uummannami sanaartorfissat arfineq pingasut atorneqanngitsut
Uummannami ilinniartitsisumut illup nutaap saniatigut KNI siusinnerusukkut najugaqarfissamik illumik sanaartorsimavoq. Naalakkersuisut inuusuttunut inissianik arfineq pingasunik sanaartorsimapput, maannakkullu inissianik nutaanik sisamanik imalimmik inissiaqarfimmik sanaartorlutik.
Uummannap kitaatungaani sanaartorfissagissarneqarsimasumi sanaartorfissat arfineq pingasut suli atorneqanngillat.
Sanaartorfissamik soqutiginnikkuit Avannaata Kommunia attavigisinnaavat.
