Iluarsaassinissamut tapiissutit

Iluarsaassinernut tapiissutit aningaasaqarnikkut tapersiissutaapput, Namminersorlutik Oqartussat inissianik piginnittunut isertitakitsunut tapersiissutigisinnaasaat. Aaqqissuussinermi inissianik piginnittut iluarsaassinernik, inissiat qanoq isuusiinik, atuunnerinik atorsinnaanerinillu pitsannguiffiusussanik ikiorneqarnissaat siunertarineqarpoq. Aaqqissuussinermi inissiat iluarsaanneqarnissaannut, pitsanngortinneqarnissaannut allineqarnissaannullu tapiisoqartarpoq. Aamma iliuusissanut, aaqqissuussinermi piumasaqaatit naammassineqarsimappata illup iluata silaannaata radon-eqassusianik annikillititsiffiusussanut tapiisoqartarpoq.

150.000 koruunit tikillugit tapiiffigineqarsinnaavutit.

Tamatuma saniatigut iliuusissanut, inissiap iluata silaannaata radon-eqassusianik annikillititsiffiusussanut 100.000 koruunit tikillugit tapiiffigineqarnissamut immikkut ittumik periarfissaqartitsisoqarpoq. Quppernermi matuma kingusinnerusukkut radon-eqassutsimut tapiissutit pillugit annertunerusunik atugaqarsinnaavutit: Pingaarutilik: Namminersorlutik Oqartussanit tapiiffigineqarnissamik allakkatigut neriorsuummik tigusaqarsimatinnak sanasumut pituttuiffiusumik isumaqatigiissuteqassanngilatit imaluunniit suliassanik aallartitsissanngilatit.

 

Kikkut tapiiffigineqarsinnaappat?

Iluarsaassinernut tapiiffigineqassaguit piumasaqaatit arlallit naammassisimasussaavatit.
Tunngaviusumik tapiffigineqarnissamik qinnuteqarsinnaavutit:

• inissiaq pigigukku aamma inissiaq ukioq kaajallallugu najugaqarfittut atorukku,
• maanna imaluunniit siusinnerusukkut Namminersorlutik Oqartussanit inissiamut taarsigassarsitinneqarsimaguit, imaluunniit maanna piginnittut siusinnerusukkut Namminersorlutik Oqartussanit inissiamut taarsigassarsitinneqarsimappata,
• inoqutigiit ukiuni kingullerni marlunni inaarutaasumik ukiumut akileraarutaasussatut isertitaat 300.000 koruuninik amerlassuseqarsimappata, imaluunniit inoqutigiit isertitaat siunissami qaninnerusumi ukiumut isertitaat akileraarutaasussat 300.000 koruunit inorlugit amerlassuseqarnissaat naatsorsuutigineqarpat,
• qinnuteqarnissamut qaammatini kingullerni 60 kingullerni inissiami iluarsaassinermut, pitsannguinermut alliliinermulluunnit pisortat tapiissuteqarsimanngippata, aamma
• inissiaq sumiiffimmi, nalinginnaasumik aningaaserivimmiit imaluunniit realkredit-imik taarsigassarsititsisarfimmiit inissiaq qularnaveeqqussiissutigalugu taarsigassarsiffiusinnaanngitsumi inissisimappat.

Meeqqanik 18-it inorlugit ukiulinnik najukkami nalunaarsorsimallutik angerlarsimaffimmi najugaqartoqarpat, isertitanut killiliussaq meeqqamut ataatsimut 4.000 koruuninik qaffanneqassaaq, taamaattorli meeqqat amerlanerpaamik arfiniliussallutik.

Qinnuteqaatit Namminersorlutik Oqartussat naliliiffigilerpassuk, ilaatigut suliassat kissaatigineqartut annertussusii, inissiap pisoqaassusia niuernermilu nalinga, kiisalu pitsanngorsaataasinnaasut alliliissutaasinnaasullu aningaasaqarninnut sanilliunneqarneri aammalu illit nammineerlutit suliarisinnaasannut sanilliunneqarneri ilaatinneqassapput.

Iluarsaassinernut tapiiffigineqarnissamik qinnuteqaleruit, uppernarsaatissat, qinnuteqaativit suliarinissaanut pisariaqartut ilanngutissavatit.

Tunngaviusumik nassiussassatit tassaapput:

• najukkamut uppernarsaat aamma CPR-normu,
• piginnittuunermut uppernarsaat, soorlu piginnittuunermut allagartaq,
• inoqutigiit isertitaannut inaarutaasumik naatsorsukkat uppernarsaatilluunniit allat,
• inissiaq pillugu nassuiaatit, taakkununnga inissiap pisoqaassusia, angissusia qanorlu issusia ilanngullugit,
• suliassanut tapiiffigineqarnissamik qinnuteqaatigisannut nassuiaat,
• neqeroorut imaluunniit suliassamut aningaasartuutissanut tamarmiusunut missingiut,
• suliap ilaanut nammineerlutit aningaasalersuiniaruit, nammineerluni aningaasalersuinissamut uppernarsaat,
• akiliisitsiniartarnermut oqartussaasut pisortanut akiitsorisinnaasatit pillugit nalunaarut, aamma
• suliassanut tamanna pisariaqartinneqarpat nunaminertamik atugassiissut imaluunniit nunaminertamik inniminniissut.

Ikuallattoornissamut illullu ajoqusernissaanut sillimmasiisimanermut uppernarsaat kingusinnerpaamik tapiissutit tunniunneqannginnerini pigineqariissaaq.

Namminersorlutik Oqartussat qinnuteqaammik suliaqarnerminni pisariaqartikkunikku , paasissutissanik uppernarsaatissanilluunniit amerlanerusunik qinnuteqarsinnaapput.

Qinnuteqaativit nassiutinnginnerani uku misissorsinnaavatit:

☐ Aaqqissuussinermut piumasaqaatit atuarnissaat.
☐ Najukkamut uppernarsaammik ilanngussineq.
☐ Inoqutigiit isertitaannut inaarutaasumik naatsorsukkanik uppernarsaatilluunniit allanik ilanngussineq.
☐ Sanasumut pituttuiffiusumik isumaqatigiissuteqarsimannginneq imaluunniit suliamik aallartitsisimannginneq.
☐ Piginnittuunermut uppernarsaammik, soorlu piginnittuunermut allagartamik ilanngussineq.
☐ Suliassat tapiiffigineqarnissamik qinnuteqaateqarfiusut pillugit nassuiaat.
☐ Inissiap pisoqaassusianut, angissusianut qanorlu issusianut nassuiaat.
☐ Neqeroorummik imaluunniit aningaasartuutissanut missingiummik ilanngussineq.
☐ Nammineerluni aningaasaliissutigisinnaasanut uppernarsaammut ilanngussineq.
☐ Akiliisitsiniartarnermut oqartussaasunit pisortanut akiitsorisinnaasat pillugit nalunaarummik ilanngussineq.
☐ Suliassami pisariaqartinneqarpat nunaminertamik atugassiissutaasinnaasumik nunaminertamilluunniit inniminniissutaasinnaasumik ilanngussineq.
☐ Uppernarsaatinik attuumassuteqarsinnaasunik allanik ilanngussineq.

Qinnuteqaat piareerpat uunga nassiunneqarsinnaavoq: boligfinansiering@nanoq.gl

Qinnuteqaatit akuerineqarpat allakkatigut neriorsuummik Namminersorlutik Oqartussaniit pissarsissaatit. Neriorsuummi tapiissutissani aningaasartaliussaagallartut piumasaqaatillu tapiissutinut atuuttussat allassimassapput.

Neriorsuuteqartoqareernerani suliassaq imaluunniit aningaasartuutissatut allannguuteqassappata, tamanna pilertornerpaamik Namminersorlutik Oqartussanut nalunaarutigissavat.

Tapiissutit aningaasartassaat inaarutaasut sanaartornermut naatsorsuutit inaarutaasut tunngavigalugit aalajangerneqassapput. Sanaartornermut naatsorsuutit allamit suliamut attuumassuteqanngitsumit uppernarsarneqassapput.

Suliaq naammassippat, aammalu uppernarsaatissat pisariaqartut tiguneqareerpata akuerineqareerpatalu tapiissutit akilerneqassapput. Ilaatigut sanaartornermut naatsorsuutit akuerineqarsimasut aamma inissiap ikuallattoornissamut illullu ajoqusernissaanut sillimmaserneqarsimaneranut uppernarsaat piareersimassapput. Aamma alliliinermi atuilernissamut akuersissut piareersimassaaq.

Tapiissutit entreprenørimut sanasumulluunniit, suliassamik isumaginnittuusimasumut toqqaannartumik akilerneqassanersut Namminersorlutik Oqartussat aalajangersinnaavaat.

Iliuusissanut, aaqqissuussinermi piumasaqaatit naammassisimagukkit inissiap iluata silaannaata radon-eqassusianik annikillititsiffiusussanut tapiisoqartarpoq.
100.000 koruunit tikillugit tapiisoqarsinnaavoq.

Kikkut tapiiffigineqarsinnaappat?

Tunngaviusumik qinnuteqarsinnaavutit:

• inissiaq pigigukku aammalu ukioq kaajallallugu inissiatut najugaqarfigigukku,
• inoqutigiit ukiumut isertitaanni akileraarutaasussani aaqqissuussinermi isertitassatut piumasaqaatit naammassineqarsimappata,
• inissiap iluata silaannaata radon-eqassusiata Kalaallit Nunaanni Illuliornermut Malittarisassani killissarititaasoq qaangersimappagu,
• aningaaserivimmit imaluunniit realkredit-imik taarsigassarsititsisarfimmit piumasaqaatit nalinginnaasut atorlugit aningaasalersuisoqarnissaanut itigartinneqarsimaguit,
• inissiaq ikuallattoornissamut illullu ajoqusernissaanut sillimmaserneqarsimappat, sillimmasiissummullu akilinngitsuukkanik akiitsoqarfigineqanngippat,
• aningaasartuutit sinneri, tapiissutinit matussuserneqarsinnaanngitsut nammineerlutit akilertussaagukkit.

Isertitassanut killiliussat tunngaviusumik ukiumut 300.000 koruuninut aalajangigaapput. Meeqqanik 18-it inorlugit ukiulinnik najukkami nalunaarsorsimallutik angerlarsimaffimmi najugaqartoqarpat, isertitanut killiliussaq meeqqamut ataatsimut 4.000 koruuninik qaffanneqassaaq, taamaattorli meeqqat amerlanerpaamik arfiniliussallutik.

Suut qinnuteqaammut ilanngullugit nassiutissavigit?

Tunngaviusumik uku ilanngutissavatit:

• najukkamut uppernarsaat,
• inaarutaasumik naatsorsukkat imaluunniit inoqutigiit isertitaannut uppernarsaatit allat,
• piginnittuunermut uppernarsaat, soorlu piginnittuunermut allagartaq,
• radon-imut uuttuiffiusut matoqqasut amerlassusii, taakku sumut inissinneqarsimaneri aammalu piffissat uuttuiffiusut suuneri pillugit paasissutissat,
• laboratoriap radon-imik uuttortaaneq pillugu nalunaarusiaa,
• radon-eqassutsimik annikillisitsiniarluni qanoq iliuuseqartoqartariaqarneranut illut pillugit ilisimasalimmit allakkatigut inassuteqaat,
• aningaaserivimmit imaluunniit realkredit-imik taarsigassarsititsisarfinniit itigartitsissut,
• neqeroorut imaluunniit iliuusissanut pilersaarutaasunut aningaasartuutissanut missingiut,
• inissiap ikuallattoornissamut illullu ajoqusernissaanut sillimmaserneqarsimaneranut aammalu sillimmasiissutinut akilinngitsuukkanik akiligassaqartoqannginneranut uppernarsaat,
• aningaasartuutit sinnerisa, tapiissutinit matussuserneqarsinnaanngitsut nammineerlutit akiligassatit qanoq iliorlutit aningaasalersorniarnerlugit uppernarsaat.