Kulturikkut immikkut ittumik suliniuteqarsimasunut inummut imaluunniit inunnut arlalinnut suliniaqatigiiffinnulluunniit nersornaat tunniunneqartartoq, 1982-imi Naalakkersuisut pilersippaat. Nersornaat ”Kalaallit Nunaanni kulturikkut nersornaat”-mik taaneqartarpoq ukiullu tamaasa inuiattut ullorsiornermi juni-p 21-anni tunniunneqartarluni.
Nersornaat makkuninnga ilaqartinneqartarpoq
• allagartaq nersornaatisisaq (diplom)
• aamma aningaasat akileraarusigaanngitsut katillugit 50.000 kr.-it
Nersornaat inunnut arlalinnut tunniunneqartillugu aningaasartai agguarneqartarput.
Nersornaammik pissarsisussaq Ilinniartitaanermut, Kultureqarnermut Ilageeqarnermullu Naalakkersuisumit toqqarneqartarpoq.
Nersornaammik pissarsisussap aqqa imaluunniit aqqi, juni-p 21-anni pisortatigoortumik katerisimaarnermi tamanut saqqummiussinissap tungaanut isertuunneqartarput.