Qupperneq una aqqutigalugu naammagittaalliutit assigiinngitsut marluk nassiussinnaavatit, sullissineq pillugu naammagittaalliuut imaluunniit peqqinnissakkut katsorsartinnermut atatillugu naammagittaalliuut. Eqqortumik sullinneqarnissaq eqqarsaatigalugu eqqortumik nassiussinissat pingaaruteqarpoq, tamanna pillugu ataani paasisaqarnerusinnaavutit.
Kiffartuussineq pillugu naammagittaalliuut:
Kiffartuussineq pillugu naammagittaalliorneq tassaavoq peqqinnissaqarfimmi sulineq pillugu naammagittaalliorneq, tassa peqqinnissaqarfimmi sullissisoqarneranut tunngavoq.
Assersuutigalugu peqqinnissaqarfimmi sulisut pissusilersuutaanut, eqqiaanermut, ammasarfinnut, utaqqinerup sivisussusaanut najukkamiluunniit pissutsinut naammagittaalliutaasinnaavoq.
Kiffartuussineq pillugu naammagittaalliutit assersuutitut ukununnga tunngasinnaapput:
”Napparsimmavimmut sianerpunga sulisumillu oqaloqateqarnissara akunnerpaalunni utaqqivara, paasissutissaatikka piumavai paasitippaanngalu ullup ingerlanerani attavigineqassasunga kisianni attavigineqanngilanga.”
”Immikkoortortaqarfimmi sulisumit naammaginartumik ikiorneqanngilanga nerisaqartinneqarnangalu, aali piffissami tassani innangaannartuullunga. ”
”Ippassaq unitsinneqarpunga. Suliaritinnginninni uffaqquneqarpunga, uffariarama uffarfik ipertooq naammattoorpara. Sulisunut saaffiginnippunga. Sulisunit uffarfik eqqiarneqarusunngilaq uffa atortariaqariga.”
Eqqiluisaarnermut, pissusilersuutinut, nerisaqarnermut, nakorsap utaqqineranut imaluunniit peqqissaavimmi utaqqinermut assigisaaniluunniit pisunut atugassarititaasunut naammaginanngitsunik nalaataqarsimaguit, quppernermi uani sullissineq pillugu naammagittaalliornissamut periarfissaqarputit.
Malugiuk:
Kiffartuussineq pillugu naammagittaalliorniaruit, ataaniittoq Kiffartuussineq pillugu naammagittaalliorneq tooruk.
Peqqinnissakkut sullinneqarneq pillugu naammagittaalliorneq:
Napparsimmaveqarfimmi peqqinnissakkut sullinneqarneq pillugu qulaajaanernut uani naammagittaalliortoqarsinnaavoq.
Peqqinnissakkut sullinneqarnermut, assersuutigalugu misissortinnermut, qulaajaanermut, nappaammik kukkusumik suussusiliinermut imaluunniit kukkusumik nakorsaaserneqarnermut naammagittaalliortoqarsinnaavoq.
Peqqinnissakkut sullinneqarnermut atatillugu naammagittaalliutit assersuutigalugu ukuusinnaapput:
”Qaqqami pisuttuarlunga orlugama ujararujussuarmut najungasukka annersippakka, tilluusarpunga anniarujussuarlungalu, kisanni peqqinnissaqarfimmut attaveqarama paasitinneqarpunga misissortinnissara pisariaqanngitsoq. Arlaleriarlunga napparsimmavimmut sianertaraluarpunga, sapaatip akunnera qaangiummat peqqissaasumut nakorsiarpunga tassanilu paasitinneqarpunga najungasora ataaseq napisimasoq ”
”Seeqqukkut suliaritinnera pillugu naammagittaalliuteqarpunga. Suliaritinnera naammaginanngilaq, anniartangaarama allaat nikorfasinnaanngilanga.
Suliaritinninniit qaammatit pingasunngormata anniangaarama nikorfasinnaajunnaarama napparsimmavimmut sianerpunga. Nakorsap oqaluussama seeqqora misissorumanngilaa.”
”Peqqinnissaqarfimmi katsorsartinnera pillugu naammagittaalliorpunga. Eqqortumik katsorsarneqanngilanga kukkusumillu nakorsaaserneqarlunga. ”
”Panimma kigutai narlorissarneqarsinnaajunnaarneri pillugu naammagittaalliorpunga. Paniga kigutit narlorissaasuanit misissorneqarpoq, takkutinngitsoornittalu kingorna kigutai narlorissarneqarsinnaajunnaarput, uffa panima kigutini narlorinngimmata qilanaartorujussuugaluartoq.”
Malugiuk:
Peqqinnissakkut sullinneqarnermut atatillugu naammagittaalliorniaruit, ataaniittoq Peqqinnissakkut sullinneqarneq pillugu naammagittaalliorneq tooruk