Pisassiissutit niuerutigineqarsinnaasut nammineq pigisanut (PNNP) aalisarnerni pisassiissutinik nuussisinnaanerit periarfissaapput.
Tamanna aalisarnernut makkununnga atuuppoq:
• Kalaallit Nunaata Kitaani raajarniarneq
• Tunumi raajarniarneq
• Kalaallit Nunaata Kitaani avataasiorluni qaleralinniarneq
• Tunumi avataasiorluni qaleralinniarneq
• Kalaallit Nunaata Kitaani assagiarsunniarneq
• Qeqertarsuup Tunuani, Upernavimmi Uummannamilu aqutsiveqarfinni qaleralinniarneq
Malugeqquneqarpoq Qeqertarsuup tunuani, Upernavimmi Uummannamilu angallatinut 6 meteriniik naannerusunut (umiatsiaaqqanut) PNNP-imi peqataaniarnerlutik aalisartut nammineq aalajangersinnaagamikku, angallatinulli 6 meterinik takinerusunut PNNP-imik aalisarneq piumasaqaataalluni.
Ukiut tamaasa Naalakkersuisut PNNP-inik aalisarnernut ukiumut akuerisaasumik pisarineqarsinnaasut (TAC) aalajangersartarpaat. Aqutsiveqarfinni ataasiakkaani tamani Qeqertarsuup Tunuani, Upernavimmi Uummannamilu pisassiissutit tamarmiusut (TAC) aalajangersarneqartarput.
PNNP atorlugu makkunannga periarfissaqarputit:
• Pisassiissutinik ukiup tullianut nuussineq, ukiup siuliani pisassiissutinik pisarineqarsimanngitsunik ukiumut atuuttumut nuussineq.
• Pisassiissutinik kingumut nuussineq, ukiup tulliani pisassiissutissanik ukiumut atuuttumut nuussineq.
Pisassiissutinik nuussinissamik qinnuteqarniaruit, aalisarnernut PNNP-linnut ukiumut pisassaqarnissat piumasaqaataavoq.
Tamatuma saniatigut ukiup siuliani imaluunniit ukiup tulliani illit ukiumut pisassannit amerlanerpaamik ukiumut pisassavit 25%-ii nuussinnaavatit.
Illit ukiumut pisassavit ilaannik ukiup ingerlanerani tunisissaguit, pisassiissutit ukiup tullianut nuussinnaasavit amerlassusai ikilisissavatit.
Taamaalilluni pisassiissutit amerlassusaannik tunisineq pisassiissutinillu nuussinerit imminnut sunnertarput.
Ukiup tullianut nuussineq
Illit PNNP atorlugu aalisartutut atuisussaatitaavutit, tassa isumaqarpoq ukiut tamaasa pisassappit minnerpaamik 75%-ii aalisartartussaavatit. Tamanna ima paasineqassaaq, illit ukiumut pisassatit aalisarsinnaanngikkukkit ukiumut pisassavit 25%-ii angullugit ukiup tullianut nuussinnaagitit (ukiup tullianut nuussineq).
Ukiup tullianut nuussatit tunisinnaanngilatit. Ukiumi pineqartumi 31. decemberip tungaanut ukiup tullianut nuussatit aalisarsinnaavatit.
Ukiumut pisassavit annerpaamik 10%-ii aalisartumut allamut ukiup ingerlanerani aalisarsinnaasumut tuninissaanut aamma periarfissaqarputit. Ukiumut pisassavit ilaannik tunisissaguit, tunisavit amerlaqataannik pisassiissutit nuunneqarsinnaanerinut tamanna sunniuteqassaaq.
Kingumut nuussineq
Ukiumut pisassat pigisatit tamakkerlugit aalisarsimagukkit, ukiup tulliani pisassavit kingumoorlutit nuunnissaanut periarfissaqarputit (pisassiissutinik ukiup tullianiik ukiumut atuuttumut nuussineq). Maluginiassallugit pingaaruteqarput ukiup tulliani ukiumut pisassiissutinit kinguartillugit aalisariikkavit ilanngaatigineqartussanngorneri.
Pisassiissutinik ukiup tullianiit ukiumut atuuttumut nuutatit tunisinnaanngilatit pisassiissutillu ukiumi atuuttumi 31. december nungullugit aalisareertussaassavatit.
Pisassiissutinik ukiup tullianiit ukiumut atuuttumut siusinnerpaamik nuussannit 15.november aalisarsinnaanngussavatit, ukiumilu atuuttumi 31. decemberip tungaanut aalisarsinnaallugit. Kingumut nuussinitit tamakkerlugit aalisarsinnaanngikkukkit aalisarnermut immikkoortortaqarfiup ingerlaannartumik amerlassutsit ukiumut tulliuttumut utertikkumaarpai.