Avannaata Kommunianut arsaat 1000-it

Arsat tamakkerlutik kommunimi inoqarfinnut tamanut agguaanneqarput. Arsaqatigiiffinnut, atuarfinnut ulluuneranilu paaqqinnittarfinnut. Ilulissani ilaatigut fritidshjemme-mut, utoqqaat peqatigiiffiannut Uvaasaq-mut aamma timersoqatigiiffinnut I-69-imut Nagdlunguak´-mullu agguarneqarput.

Otto Motzfeldt Qaqortumi inunngorsimavoq, 11-nillu ukioqarluni Danmarkimut nuussimalluni. Ukiut 40-it sinnerlugit arsartarsimavoq, Qallunaat Nunaanni Italiamilu klubbini. Isikkamik arsarneq inuuneranut ilaasorujussuuvoq, arsarnermillu nuannarisaqarnermik tunisinnaanini nuannaarutigaa.

- Arsaq pinnguassatsialaavoq, ikinngutigiinnermik nukinnillu pilersitsisartoq. Ukiorpassuarni nammineq arsartarsimavunga, Qallunaat Nunaanni, aammali Italiami, arsamik unammineq nuannersuujuaannarpoq, Otto Motzfeldt oqaluttuarpoq.
Otto Motzfeldt-ip Avannaata Kommunianut arsanik 1000-nik tunnissuteqarnera Avannaata Kommuniani Borgmesterip Palle Jerimiassenip nuannaarutigeqaa.

- Kommunimi aalarusuppugut. Taamaattumik nuannaarutigivara arsat amerlanerpaanut agguaanneqarnerat. Tunissummut angisuumut qujarusuppugut, qularutiginngilaralu nalunaaquttap akunnerpaassuini arsarnermut atorluarneqarumaartut ikinngutigiilersitsiumaartullu, Palle Jerimiassen oqarpoq.

Ukiut tamaasa Otto Motzfeldt ullorsiusiortarpoq ajunngitsuliornissi siunertaralugu. Ullorsiutinit sinneqartoorutit arsanik pisissutigisarpai.

- Kalaallit Nunaanni suliffeqarfiit arlallit ullorsiutinut aningaasanik pinnatassanillu tunisisarput, taamaalillungalu tunniusseqqinnissanut periarfissittarlunga, oqaluttuarpoq.
Otto Motzfeldt nuliaqarpoq, Stefania, marlunnillu meeraqarput. Otto Motzfeldt ulluinnarni allakkerisartuuvoq, sunngiffimminilu nammineq suliffiutimini Motzfeldt IT-mi sulisarluni, nittartagaliortarluni ullorsiusiortarlunilu.
​