Ukiumoortumik Inippaat Festival Upernavimmi ingerlanneqarmat qitiffissaq issiavissallu ulikkaapallapput, aaqqissuussinerlu aatsaat taama peqataaffigineqartigaaq. Tusarnaariat amerlassusiat aamma nipilersortartut assigiinngitsut peqataasut amerlassusiat eqqarsaatigalugit.
Nuna tamakkerlugu ilisarisimaneqartut Mariina aamma MUK, kiisalu Nikku Brandt, saniatigut Upernaviup eqqaani nipilersortartut assigiinngitsut tallimat tusarnaartitsinermi peqataapput.
”Upernavimmi nipilersortartoqangaatsiarpugut, pingaartuuvorlu tusarnaartitsinermi peqataasarnissaat, taamaalillutik imminnut isumassarsivigeqatigiittarnissaat uagutsinnullu misigisaqartitsilluartarnissaat eqqarsaatigalugu,” taama oqarpoq Knud Kristiansen, Avannaata Kommuniani Upernavimmi Peqqinneq Sunngiffillu immikkoortortaqarfiani aqutsisoq.
Knud Kristiansen Inippaat Festival-ertarnermik aallarnisaasut ilagaat, nuannaarutiginerarpaalu aaqqissuussineq ukiumit ukiumut alliartuinnavimmat.
”Ajunngilluinnarpoq, innuttaasut taama amerlatigisut, qanoq ukioqarnertik apeqqutaatinnagu, festival-imik tapersersuimmata tusarnaartitsinernullu tusarnaariartarlutik. Ukioq manna nunaqarfinniit amerlaqisut umiatsiarlutik tusarnaariakaasimapput,” Knud Kristiansen oqaluttuarpoq.
Upernavimmiit tusarnaartitseqataasut nipilersoqatigiit ukuupput: Kallerit, Tullii, Suulut, Hartmann aamma Naalukkut.
Upernavimmi nipilersornermik peqatigiiffiit pingasuupput.