Aalisartut susassaqartullu allat Kalaallit Nunaanni aalisarneq piniarnerlu pillugit saqqummersitsinerit annersaannut, PolarExpo-mut, iserniarlutik piareersimapput, Ilulissat Timersortarfianni matut ammarneqarmata 8. oktober 2024.
”Avannaani aalisartut sumiiffinnilu allaneersut PolarExpo Fishing & Huntingimi, nunatsinni taamatut aaqqissuussat annersaanni, peqataasarnissaat periarfissaqarnissaallu kommunitut pingaartitaraarput, taamaaliornikkummi aalisarnermi piniarnermilu susoqarneranik paasisaqarnissaat kommunetut soqutigisaringatsigu,” Palle Jerimiassen, Avannaata Kommuniani borgmesteri oqarpoq.
PolarExpo Fishing & Hunting-imi ukioq manna saqqummersitseqataasut 50-iupput, atortussanik neqeroorutinillu assigiinngitsorpassuarnik inunnut ussagartunut saqqummersitsillutik. Saqqummersitsineq Aalborg Kongres aamma Kultur Center (AKKC) suleqatigalugu ingerlanneqarpoq, borgmesterillu ilimasaarutigaa, AKKC-p aamma Avannaata Kommuniata suleqatigiinnerup ingerlaqqinnissaa sulissutigineqartoq.
”Aalisarnermut piniarnermullu tunngasunik saqqummersitsineq innuttaasunut soqutiginarluinnartuupput, uagullu kommunitut tapersersuerusuppugut, aalisartut malinnaanissaannut, aalisarnerup iluani susoqarneranik aammalu inuussutissarsiornerup iluani atortut ilisimasallu nutaanerpaat pissarsiarineqarnissaannut,” borgmester Palle Jerimiassen erseqqissaavoq.
Avannaata Kommuniani innuttaasut 3.000 missaanniittut aalisarnermik inuussutissarsiuteqarnerup iluani, minnerusumik annerusumilluunniit, ingerlataqarput, innuttaasullu 1.000-it missaanniittut inuussutissarsiutigalugu aalisartutut piniartutullu allagartaqarput.
Ukioq mannattaaq PolarExpo-mut atatillugu qulequttat assigiinngitsut pillugit isumasioqatigiinnerit assigiinngitsut ingerlanneqassapput, qulequttat aalisartunut allanullu soqutiginartut pillugit.
Assersuutigalugu, pingasunngorpat Oceans North Kalaallit Nunaat aggersaavoq aalisartunut piniartunullu, piujuaannartitsinermik tunngaveqarluni aalisarneq oqaluuseriumallugu. Pilersaarut tamakkerlugu uani aasinnaavat Program - PolarExpo
Inuussutissarsiornermik ineriartortitsineq pitsaasoq tapersersorlugu
PolarExpo taamaallaat aalisarnermi inuussutissarsiornermut soqutiginanngilaq. Saqqummersitsinerulli piffissap takornariaqarfiunerpaasartup avataanut inissinneqarsimaneratigut najukkami takornariartitsinermik suliaqartut tapersersorniarneqarput.
”PolarExpoep oktobarimi ingerlanneqartarneranut peqqutaasut ilaat tassaavoq aasami ulapaareerluni takornarialerinerup naammassiartornerani najukkami inuussutissarsiornerup ingerlaannarnissaa kommunemiit kissaatigigatsigu.” taama borgmester ilaatigut oqarpoq.
Saqqummersitseqataasut ullullu ingerlanissaannut pilersaarut uaniipput Udstillere - PolarExpo
