Avannaata Kommunia avinneqassangaluarpat, tamanna Qaanaamut sutigut kinguneqassava? Tamanna qanoq akissutissaqarnersoq innuttaasut 70-it pallillugit soqutigisimavaat, borgmester Palle Jerimiassen illoqarfimmi innuttaasunik ataatsimiisitsimmat.
Apeqqutit oqaaseqaatillu amerlaqaat, ingammillu tusassallugu soqutigineqarpoq, kommune avinneqarpat kommunit nutaat sutigut suleqatigiissinnaanersut. Qaanaaq nunaqarfittaalu 700 miss. inoqarput, amerlasuunillu takorloorneqarpoq, kommunimi nutaami mikisumi inatsisitigut allaffissornikkullu suliassanik suliaqarsinnaasut ilinniarsimasut pissarsiarinissaat naammattut ajornakusuussasoq.
Borgmester Palle Jerimiassenip oqaluttuaraa, kommunalbestyrelsip eqqumaffigingaa, kommunit mikinerusut imminiiginnarneqarsinnaanngitsut. Assersuutigalugu Aningaasaqarnermut ataatsimiititaliaq Savalimmiunut tikeraarsimavoq, tassani kommunit 23-iupput, kommunillu mikinerusut anginerusullu suleqatigiititerput suliassat arlalippassuit pillugit – tamannalu Avannaa eqqarsaatigalugu aamma periarfissaasinnaavoq.
Innuttaasut ataatsimiisinneqarneranni innuttaasut arlallit oqariartuutigaat, pingaaruteqartoq avannaani najukkani oqartussaaqataanerup nukittorsarneqarnissaa, taamaaliornikkut ineriartornermut sunniuteqaqataanerusinnaagamik. Silap pissusaata allanngoriartornerata malitsigisaanik sikuusarnera sivikinnerulerpoq, taamaalillunilu piniarnissamut periarfissat annikillillutik, tamannalu piniartutut inuussutissarsiuteqarnermut annertuumik tatisivoq. Taamaattumik inuussutissarsiutinik nutaanik isertitaqarfiusinnaasunillu periarfissanik allanik inerisaanissaq atorfissaqartinneqarpoq, tamanna atuarfiup inersuaani, innuttaasunik ataatsimiisitsiffiusumiit, tusaaneqarsinnaavoq.
Avannaata Kommunia nalunaarusiortitsisimavoq kommunip kommuninut arlalinnut avinneqaraluarpat kingunerisinnaasai pillugit. Nalunaarusiortuuvoq kommunip kukkunersiuisua BDO. Nalunaarusiaq taanna uani nanisinnaavat: BDO-p nalunaarusiaa
