Qatserisartut Avannaata Kommunianeersut pujorsiortutut atuarnerat

11. november 2024

Saamerlermiit, tunorliit: Nuka Johnsen Upernavik, Edgar Markussen Ilulissat, Aka-Knud Korniliussen Uummannaq, Ole Jakobsen Ilulissat, Hans-Lars Markussen Uummannaq, Salomon Petersen Aappilattoq. Saamerlermiit, saarliit: Birthe Reimer Søholm Ilulissat, Lars Karl Karlsen Upernavik Kujalleq, Rasmus Jonathansen Ikerasak, Ole Gundel Uummannaq, Inunnguaq Pjettursson Ilulissat.

Qatserisartut Avannaata Kommunianeersut pujorsiortutut atuarnerat sapaatip akunnera 40-miit 43 ilanngullugu, siullerpaamik Ilulissani ingerlanneqartumi naammassisut qatserisartut 12-t Ilulissaniit, Uummannamiit nunaqarfiiniillu aammalu Upernavik nunaqarfiiniillu peqataaffingineqartoq naammassilluarpoq, atuartussat qatserisartut 15-t peqataaffigisussaangaluaraat 12-t atuarneq naammassivaat angusarissaarlutik, atuarnerup aallartinnerani ataaseq silamik peqqutilimmik anngutinngittoorpoq, marlullu aallartisimalernermi peqquteqarlutik ilinniarnertik unitsiinnartariaqarsimallugu.

Qatserisartut pujorsiortunngorniarneranni Ilulissaneersunit Uummannameersunillu ilitsersuisulerluni atuarnerat ingerlanneqarpoq, Ilulissat qatserisartoqarfiani.

Pujorsiortunngorniarneq Qallunaat Nunaanni Upalungaarsimanermut Aqutsisoqarfimmiit akuerisamik ingerlanneqarpoq, nunanilu tamalaani atorneqarsinnaalluni.