Ullumi marlunngornermi 19. november 2024 Avannaata Kommuniani borgmesterip Palle Jerimiassenip atsiorpaa, 2025-imut ataatsimoortumik tapiissutit pillugit isumaqatigiissut, Nunatsinni bogmestereqatini peqatigalugit.
Borgmesterip immikkut nuannaarutigivaa, angujumasani iluatsissimammat, tassalu kommunit eqqagassalerinermut pilersaarummut maanna atuuttumut kommunit immikkut aningaasartuutigineruligassaannut Avatangiisinut Aningaasaateqarfimmut immikkoortinneqartut ilaannik Avannaata Kommunia pissarsisussanngormat.
”Isumaqatigiissut atsiorsinnaasimanngilarput, Avatangiisinut Aningaasaateqarfimmut aningaasat immikkoortinneqarsimasut Nunatsinni kommuninut naligiimmik agguaanneqanngippata, apeqqutaatinnagu kommune ESANI-mut ilaasortaanersoq ilaasortaannginnersorluunniit. Avannaata Kommuniani ESANI-mut ilaasortaanata allatut aaqqissuusserusussimavugut, taamaaliornerpulli pissutigiinnarlugu nuna tamakkerlugu eqqagassalerinermut aningaasaliissutit agguaanneqarneranni ajornerusumik pineqartussaanngilagut”, Avannaata Kommuniani borgmesteri Palle Jerimiassen oqarpoq.
Kommuni ulluni makkunani missingersuutit pillugit isumasioqatigiippoq, tallimanngorpallu 22. november 2024 Kommunalbestyrelsip ileqquusumik ataatsimiinnera kingulleq pissaaq, tassani ilaatigut 2025-imut missingersuut isumaqatigiinniutaasussaalluni.
Ataatsimoortumik tapiissutit nuna tamakkerlugu kommuninut agguaanneqartartut 2 mia. kr. missaanniipput.
