Kommunimut akileraarut allannguuteqanngilaq.
Sapaatip akunnera ulapiffioreersoq, oqallinnerit aamma politikkikkut eqimattat ataatsimeeqattaareerernerisa kingorna kommunalbestyrelsimi ilaasortat tamakkerlutik Avannaata Kommuniani 2025-mut missingersuutit isumaqatigiissutigaat.
Kisitsisit annertuut tassaapput kommunip aningaasartuutissai katillugit 1,1 mia kr.-ngaja assapput aamma isertitassai 1,2 mia kr.-ngajaallutik.
Tamakkiisumik kommunimi karsimiittuutit 2025 naajartornerani 168 mio kr.-iussapput.
2025-mut kommunimut akileraartarut 28%-imiit allannguuteqassanngilaq aamma pisarneq malillugu kommunalbestyrelsimi ilaasortat ukiup tulliani kommunimut akileraarut pillugu nappaallutik taasipput.
”Kommunalbestyrelsi tamarmiusoq ukiup tullianut aaqqiissutissanik eqqortunik nassaarnissaminut kajumissuseqarsimanera annertooq assut tulluusimaarutigaara. Maannakkut aningaasaqarnerput nukittuujuvoq aamma uannut ingamillu innuttaasunut toqqissisimanarpoq, ataatsimoorluta innuttaasunut pitsaanerpaamik sullissinissarput nukittorsarparput aamma inerisarparput,” borgmester Palle Jerimiassen, Avannaata Kommunianit oqarpoq.
Immikkut nuannaarutigaa kommunip aningaasaqarnera patajaallisarneqarmat 2023-mi ajorseriarujussuareernerata kingorna malitsigisaannillu annertuumik kassekredit-imik pisariaqartitsisoqalersimaneranik kinguneqarsimasumit.
”Atorfillit tamarmik suliaqarujussuarnerminni aningaasaqarneq illuatungaanut saatissimavaat. Kikkut tamarmik 2023-mi immikkut ittumik sipaarniartariaqarsimapput aamma tamatuma kinguneratigut 2024-mi patajaallisaasoqarluni. Taamaammat kommunip atorfilittaanut amerlasuunut qujanaq,” borgmesteri oqarpoq.
Maannakkut aningaasaqarneq pitsaasoq pillugu kommunalbestyrelsip ileqquusumik ataatsimiinnermini kingullermi kommunip kassekredita matuniarlugu aalajangiuppaa taamaasillunilu tamatumunnga ukiumoortumik aningaasartuutaasartut 100.000 kr.-init sipaartussanngorlugit.
Isumaginnittoqarfik nukittorsarneqarpoq
Aningaasaqarneq nukittunerusoq kommunalbestyrelsip 2025-mi suliassaqarfinni assigiinngitsuni arlalinni nukittorsaanissaanut periarfissiivoq.
Ukiumi siusinnerusukkut Avannaata Kommunia innarluutilinnut suliassaqarfimmi amigartumik sullissisimanermut nakkutilliisunit oqaaseqaatinik tigusaqarpoq. 2025-mut missingersuutini innarluutilinnut suliassaqarfimmi fagchef-imik akisussaasussamik atorfinititsinissamut aningaasanik immikkoortitsisoqarpoq.
Isumaginnittoqarfimmi aningaasanik aqutsineq 2025-mut missingersuutinut Aningaasaqarnermut Ingerlatsivimmut aamma nuunneqassapput.
”Isumaginnittoqarfik aningaasaqarnitsinni initoorujussuuvoq aamma uani ukiuni kingullerni allannguutit takunikuuagut. Kissaatigaarput isumannaassallugu isumaginnittoqarfimmi atorfillit suliassaminnut pikkorissut isumaginninnikkut suliniutinik suliaqartassasut aamma aningaasaqarneq Aningaasaqarnermut Ingerlatsivik suleqatigalugu nukittorsarneqassasoq” borgmesteri oqaluttuarpoq.
Kommune 2024-mi misiliutitut suliniummik ingerlataqarpoq, tassani siusinaartumik pensionisiallit peqqissaanermut ilinniarsimasumit nalilersorneqaqqipput. Suliniummi tassani inerneri iluaqutaangaarmata suliniut 2025-mut aningaasaliiffigineqarpoq aamma peqqissaanermut ilinniarsimasumik ilaneqaqqillutik.
”Amerlasuut periarfissatik naapertorlugit inuiaqatigiinni sulinissaminnut tunniussaqarnissaminnillu kissaateqartarput. Kisianni takuarput amerlasuut suliaminnik naliliiffigineqarsimanngitsut taamaasillutik periarfissaannut tulluuttumik suliffimmik neqeroorfigineqarsimanngitsut” borgmesteri oqarpoq.
Sanaartornikkut kissaatit tamarmik akuersissutigineqarput
2025-mut sanaartornermut suliniutissanut aningaasat piffinni ataasiakkaani inoqqortussuseq naapertorlugu procentikkaarlugit agguaanneqarneri nangissapput.
”Siullerpaamik kommunalbestyrelsini ilaasortaaninni aamma kingusinnerusukut borgmesteriuninni sanaartornikkut suliniutissanut kissaatit tamarmik akuersissutigineqarput. Kommunalbestyrelsimi siuttutut inissisimalluni, suliassanullu aalajangiusimaqaqatigiilluni nuannersorujussuuvoq,” borgmesteri oqarpoq.
”Tusartagarput, ukiut tamaasa procentit aalajangersimasut agguaanneqartarnissaat maannakkut piviusunngortinneqalersoq takusinnaalerparput. Innuttaasut aamma inuussutissarsiutinik ingerlataqartut tamarmik naatsorsuutigissavaat ukiumiit ukiumut illoqarfinni nunaqarfinnilu sanaartornikkut suliassat patajaassusermik toqqissisimanermillu tunisisassasut. Takusinnaavagut najukkami sanasut ilinniartunik atorfinititsisartut siunissaq ungasinnerusoq eqqarsaatigalugu pilersaarusiornissartik pillugu, borgmester Palle Jerimiassen, Avannaata Kommunianit naggasiivoq.
2025-mut katillugu 123 mio. Kr.-nik sanaartornermut suliniutinut aningaasanik immikkoortitsisoqarpoq.
