Avannaata Kommunip annertusisamik nakkutigineqarnera ingerlaannartumik atuukkunnaartoq, Aningaasaqarnermut Akileraartarnermullu Naalakkersuisoq nalunaarpoq.
Kommunip aningaasaqarnerata siunnerfilimmik kommunalbestyrelsimit suliniuteqarfigineqarnera, aalajangernermut tunuliaqutaavoq. Aningaasanik uninngasuutit patajaatsuutinnissaat siunertaralugu kassekredititut taarsigassarsiap kingulliup atorunnaarsinnissaa, kommunalbestyrelsip kingullermik ataatsimiinnerani ullormi 22. november 2024-mi aalajangerneqarpoq. Taamaalilluni kommuni taamaattunik taarsigassarsiaqarunnaarpoq, aningaasallu uninngasuutit, 2024-p ingerlanerani 115 mio. kr.-t missaannik annertussuseqarnermikkut, maannakkullu 130 mio. kr.-nik karsimi uninngasuuteqarnikkut maanna patajaatsumik inissisimapput.
Taamatut pitsaasumik ineriartornerup annertusisamik nakkutigineqarnissamut tunngavissat atuukkunnaarnerat kinguneraa, Naalakkersuisoq oqarpoq.
Borgmester Palle Jerimiassenip Naalakkersuisup aalajangernera iluarisimaarpaa.
”Nakkutigineqarunaarnerput soorunalimi nuannaarutigaarput, aammali taama sukkatigisumik aningaasaqarnitta ilorraap tungaanut aaqqissinnaagatsigu nuannaarutigeqaarput”, Naalakkersuisup nalunaaruteqarneranut atatillugu borgmester Palle Jerimiassen taama oqarpoq.
Taamaattumik borgmesteri Avannaata Kommuniani kommunalbestyrelsimut sulisunullu angisuumik qujaniarpoq.
”Kommunip aningaasatigut pitsaanngitsumik inissittuuleraluarnera iluarseqqinniarlugu suliassaqarfinni tamani sulisut qinikkallu annertoorujussuarmik suliniuteqarsimapput. Maanna kingumut aningaasaqarnerput patajaalliseqqissimavarput ukiunilu aggersuni ineriartortitsinermut aningaasaliissuteqartarnissanullu tunngavissaalluartutut inisseqqissimallutigu, sulisorisanik piginnaanngorsaaqqinneq kommunimilu ineriartortitsineq eqqarsaatigalugit,” Palle Jerimiassen oqarpoq.
Naalakkersuisoqarfiup Avannaata Kommunianik siunnerfigissaartumik suleqateqarnerup nangittumik ingerlannissaa qilanaaraa.
Aningaasaqarnermut Akileraartarnermullu Naalakkersuisup Erik Jensenip ineriartorneq iluarisimaarpaa.
”Avannaata Kommuniata piffissap sivikitsup ingerlanerani patajaatsumik aningaasanik uninngasuuteqalernera kusanarpoq. Aningaasat uninngasuutit patajaatsut imminneq pilerneq ajorput. Aaqqissusseqqittariaqarnermik nassueruteqarneq, atuutilersitsinermilu annertuumik aalajangiusimaneq allannguinissamullu piareersimaneq periutsini nutaani aalajangiisuuvoq”.