“Maannamut ingerlalluaqaaq, suleqatigiilluaqaagut, timersortarfissuarmilu nuannisaartoqarnera malunnarpoq,” Riikki Jensen oqaluttuarpoq, taanna Avannaa Arctic Games-imut ataqatigiissaarisuuvoq, ukiorlu ataaseq sinnilaarlugu piareersaanernut ataqatigiissaarisuusimalluni.
Timersortarfissuarmi Kulturikkullu illorsuarmi Sermermiuni kommunimi sulisut ulapipput isumagisassaaqqat tamarmik ataatsimut iluatsinnissaat qulakkeerniarlugu. Eqqiaanermiit timersuutinik unammisaqattaarnernut, tamakkulu akornatigut scene-mi qulliit nipilu tulluussarneqartariaqarlutik.
”Ippassaq kingusissukkut soraarpugut, ullaakkullu suliartoqqiaartussaalluta, kaffi tiilu piareersimatittussaagatsigit. Ullaarli timersortarfissuarmut apuukkama tamakku isumagineqareersimapput, eqqiaasoqareersimavoq ullormullu nutaamut piareersimanissaq isumagineqareersimalluni. Kivitseqatigiissut tunuliaqutsiilluarput, tamannalu aamma tunuatungaani aqutsisooqataalluni assut nuannerpoq, sunami tamarmi iluatsittariaqarmat,” Riikki Jensenoqaluttuarpoq.
Peqqinneq Sunngiffimmilu pisortaq, Linda Jerimiassen ulluni makkunani aaqqissuussinerup tunuatungaani ulapittorujussuuvoq. Peqqinneq Sunngiffimmi sulisut natermi suleqataapput dommerinullu ikiortaallutik.
”Peqataasunut dommerinullu natermiittunut piareersimavugut sutigut tamatigut ikiuunnissatsinnut. Eqqiluitsuutitsinissaq, imissaqartitsineq, te, kaffi sutugassallu dommerinut isumagisussaavagut,” Linda Jerimiassen oqaluttuarpoq. Aatsaavissuaq aaqqissuussinermut taama ittumut aqutsinermik misiliivoq suleqatini sisamat ilagalugit.
”Maani timersortarfissuarmi kajumissutsiminnik ikiortaasunut akisussaasuuvugut. Ulloq tamakkerlugu unnuttalerlugu natermi dommerit isumagisussaavagut, amingaateqannginnissallu isumagalugu,” Linda Jerimiassen oqaluttuarpoq.
Peqqinneq Sunngiffimmit natermi suliassanut ikiortaavoq. “Højtalerikkut oqaaseqartartussamik amingaateqarmata suliassaq tinguara. Aallaqqaataani tuluit oqaasii sapernalaaraluartut, inuit inussiarnerlutillu ikiuukkumatoqaat, taamaakkaagallu suliassat ajornannginnerusutut ilisarput. Qiimaqaagut ataqatigiilluarlutalu, tamannalu isumaqaqaaq”, Linda Jerimiassen nuannaaqisoq oqarpoq.
Timersoqatigiiffik I-69 U18 piumassutsiminnik suleqataapput, aamma utoqqaat peqatigiiffiat Uvaasoq. Avannaa Arctic Games-imi piumassutsiminnik suleqataasunut tamanut qujanarujussuaq.
