Utoqqaat illuanni Unganarnatumi najugaqartut torlorsorfigitillutillu qilaatersorfigitipput Mia Maurice aamma Taiga Las pulaarmata.
Avannaa Arctic Games-imi unammissutsini assigiinngitsuni nukeqassutsimik takutitsinissaq kisiat pineqanngilaq. Annerpaartaami piorsarsimassutsimik paarlaasseqatigiinnissamut tunngavoq, imminullu qanillinerunissamut.
Taamaammat utoqqaat najugaqartut tupaallaatigisaminnik aamma nuannaarutigisaminnik torlorsorfigineqarput qilaatersorfigineqarlutillu.
Sisamanngornerup unnukkuani unammisaqattaarnerit naggataavi ingerlanneqarput, tamannalu saqqarmiunik tunioraanikkut naammassineqarpoq. Tassanilu utoqqaat peqatigiiffiat unammiartut naggataarnerat malinnaaffiginiarlugu ornigupput.
Utoqqaat peqatigiiffiat Uvaasoq unammiartunut aamma Avannaa Arctic Games-imi officials-itut peqataasunut ulluni taakkunani nerisassiorlutik ulapittaqattaarput.
Ullut tamaasa nerisassanik kissartunik sassaalliuteqartarput, najukkami nerisassat aallaavigalugit. Tamatuma saniatigut qiimmassaaqataapput, erinarsorlutik unammillutillu akunniliilaartarlutik. Avannaata Kommunia Utoqqaat peqatigiiffiat Uvaasoq qasusuillutik sulisimanerannut, nerisassiarisimasaannut mamartunut aamma nuannersumik kiinnertarnerannut qujaffigerusuppai.
