Borgmester Palle Jerimiassen, Avannaata Kommunia
Avannaata Kommunalbestyrelsia sinnerlugu nuannaarutigalugu ataqqinnillungalu, timersortartut Nunavimmeersut, Nunavumeersut, Nunakpummeersut uagullu Nunatsinniit timersortartuutivut tikilluaqqujumavakka.
Ilanngullugit uummammit pisumit tikilluaqquakka sungiusaasut, aqutsisut, dommerit minnerunngitsumillu Arctic Sports Greenland-ip siulersuisui. Qutsavigaatsigit piareersaanermi ikiuunnissinnut tapersersuinissinnullu matumunnga Inuit timersuutaannik unammiuaartarnissamut nutaamut.
Unammisaqattaartarnissanut ima ittunut pingaarutilinnut siunnersuuteqartutut tulluusimaarpunga, maniguullungalu uummammit tamassi tikilluaqqujumavassi.
Sinnattoq piviusunngortoq
Sinnattoq piviusunngorpoq.
Avannaata Kommunianut nuannersuuvoq Avannaa Arctic Games-imut aaqqissuussisuuneq, ukioq allortarlugu maani Ilulissani ingerlattarniakkatsinnut.
Aamma siunissaq eqqarsaatigalugu nunanit amerlanerusunit peqataasoqartarnissaa periarfissarsiuukkusupparput.
Uummammit qujarusuppungattaaq Avannaa Arctic Games piviusunngortinniarlugu Avannaata Kommuniata tapersersuineranut.
Naalakkersuinikkut siunertaraarput piffissap takornariarfiusartup ukiut tamaasa sivitsoriartortinneqarnissaa, aaqqissuussinerit kulturitsinnit ileqqutsinnillu aallaavillit aaqqissuuttarnerisigut.
Aaqqissuussineq manna malunginiagassaavoq, Issittumimi naggueqatigiit Inuit maani katersuuppugut naggueqatigiittut qileruterput nukittorsarumallugu.
Naalakkersuisunit sinniisut aamma Timersoqatigiiffiit Kattuffiata siulittaasuata najuunnerisa takutippaat, timersorneq suleqatigiinnerlu aqqutigalugit killeqarfiit akimorlugit kulturikkut ataatsimoorsinnaanerput.
Ikinngutigiinnerup ataatsimoortippaatigut
Avannaa Arctic Games 2025 periarfissaavoq immikkuullarissoq, ataatsimoorluta kingornussatta nalliuttorsiutiginissaanut ataavartumillu attaveqaqatigiinnitta sanarfinissaanut.
Pingaaruteqarluinnarpoq Issittumi naggueqatigiilluta attaveqaqatigiinnitsinnik attassiinnarlutalu nukittunerulersitsinissarput.
Qaa ataatsimoorluta periarfissaq tamanna pakkutsigu unammiuaarnerillu puigunaatsunngortillugit, siunissami suleqatigiinnerulernissatsinnut isumassarsiorfigiitigalugit.
Aaqqissuussinerup matuma timersornikkut unammiuaaqatigiinnertaqarnerata saniatigut, naggueqatigiit Inuit ataatsimoorluta oqaluttuarisaanerput, kulturerput naleqartitagullu eqqarsaatitsinniissapput.
Timersortartutut anersaaqarneq ikinngutigiinnerlu pigalugit siuaasagut ataqqiniassavagut kinguaariillu siunissami inooqatigiinnissaat aqqutissiuullugu.
Ullumi katersuunnitsigut, eqqaamatigu ataatsimoornermik anersaaq ikinngutigiinnerlu tamatsinnik ataatsimoortitsimmata.
Ileqqut, oqaatsit kulturilu ukiorpassuarni oqaluttuarisaanitsinni ataatsimooruppagu
Inuttut katerittarnerit nuannertaqaat.
Sapaatip akunnerata ingerlanerani kulturikkut aaqqissuussinerit pilersaarutaapput. Aaqqissuussinerni tamakkunani qulequtaavoq oqaluttuarisaanitsinnit oqaluttuat. Oqaluttuat kinguaariinnut ingerlateqqinneqartarnerisigut naggueqatigiit Inuit akunnitsinni qileruteqarnerput nukittorsassavarput.
Qanortoq Avannaa Arctic Games naggueqatigiit Inuit akornanni neriuuteqarnermut, isumassarsiorfittut nammaqataanermullu naaralaartitsivittut inissisimagili.
Qujanaq
Immikkut aningaasaliisunut qujanarsuaq – pingaarnertut aningaasaliisunut Air Greenland-imut aamma Avannaata Kommunianut, kiisalu maani illoqarfitsinni aningaasaliisunut Hotel Ilulissanut Knud Pedersen-imullu, kiisalu aaqqissueqatigisatsinnut Arctic Sports Greenland-imut, unammiuaarnerup matuma piviusunngortinneranut ikiuunnissinnut.
Utoqqartatsinnut uummammit qujarusuppunga, unammiuaarnerit ingerlanneqarnerisa nalaani peqataasunut tamanut nerisaqartitsisuusussanut.
Aaqqissuussinernut assigiinngitsunut illoqarfitsinni innuttaasut peqataanissaannut tikilluaqquneqarput.
Qaa ataatsimoorluta unammiuaarnerit ima ittut aqqutigalugit uppernarsaataalersitsigit issittumi naggueqatigiit Inuit ataatsimoorluta oqaluttuarisaanitsinnik kingornussisimasutut anersaakkullu tunniutiinnajuitsutut inuiattut ukiorpassuarni inuiaqatigiittut ilisarnaatigisimasarput nalliuttorsiutigalugu.
Qujanaq, unammiuaarnerit taamaalillunga ammartut nalunaarutingaara.
