Avannaata Kommunia eqqagassalerinermut pilersaarummik peqalerpoq, eqqagassat massakkut siunissamilu qanoq suliarineqartarnissaanik pilersaarutinik ersarissunik imaqartumik.
Eqqagassalerinermut pilersaarut kommunalbestyrelsip tamarmiusup isumaqatigiissutigisaanik akuerineqarpoq, missingersuutillu katillugit 200 millionit koruuningajaapput – taakkulu affaata missaat atorneqareerput. Eqqagassalerinermut pilersaarut 2029-mi nammassineqareerpat kommunip nunaqarfii 23-t illoqarfiilu sisamat eqqakkanik pitsaasumik suliarinnissinnaanngorlutillu nassiussisinnaalersimassapput.
Eqqagassalerinermut pilersaarummi anguniakkat ilagaat ullumikkornit eqqakkanik immikkoortiterinerusarnissap atoqqiinerusarnissallu qulakkeernissaa, sulisullu eqqagassalerisartut suliffimmi atugaasa pitsaanerunissaat aamma soorlu eqqagassat suliarinissaanut maskiinat nutaat atornissaanut ilinniartinneqarnissaat.
Eqqagassalerinermut pilersaarummi pingaarnertut siunertarineqarpoq
- Eqqakkanik suliaqariaatsip nutarternissaa
- Eqqakkat amerlanerusut pitsaanerusumik immikkoortiterneqartarnissaat
- Eqqakkanik amerlanerusunik atoqqiisarnissaq/atoqqitassanngortitsisarnissaq
Teknikkeqarfinni sulisut nunaqarfinni arlalinni eqqakkat aaqqissorlugillu immikoortiterneri aallartereernikuuaat umiarsuakkut nassiunnissaannut piareersarlugit. Sinneri ukiuni sisamani tulliuttuni pilersaarut malillugu maskinataassapput ilinniartinneqassapput umiarsuakkullu nassiussuisassallutik.
Umiarsuakkut Danmarkimut nassiussisarneq
Januaari 2025-mi eqqakkat 800 tonsit Avannaata Kommunianiit Danmarkimut umiarsuakkut nassiunneqarput. Eqqakkat immikkoortiterlugit plastikkinut qaqortunut poortorneqartarput. Eqqakkat Ilulissani eqqaavissuarminngaanneersuupput eqqagassalerinermullu pilersaarummi suliaqarnerup inerneraa ersarissoq. Maskiinat angisuut Ilulissani, Uummannami Upernavimmi annikinnerusumillu Qaanaami eqqakkanik sequtsereqqissaarnissamut poortuinissamullu atortussat pisiarineqareerput. Piffissap ingerlanerani eqqakkanik usingiarnissaq Danmarkimullu assartuinissaq ajornannginneruleriartussaaq. Poortorneqartarnerilu eqqakkat tipiliornerannut, niviukkanut eqqagassallu silami teqqalannartunut annikillisitsissaaq.
Eqqakkat pillugit najukkami akisussaaffik
Inoqarfiit siunissami namminneq qulakkiissuaat eqqakkat katersorneqartarlutillu eqqortumik immikkoortiterneqartarnissaat. Pingaartinneqarpoq eqqakkat eqqiluisaartumik poorneqartarnissaat ass. Big-Bags-inut, taamaasilluni sapinngisamik tipi niviukkallu pinngitsoortinneqassammata. Suliareqqinneqarnisaannut aamma ikuallaavinnut atoqqinneqarnissaannut ingerlateqqinneqartarnissaat pillugu inoqarfinniit mikinerusuniit illoqarfinnut anginerusunut umiarsuakkut nassiuttarnissaat ajornannginnerulissaaq.
Avannaata Kommuniani inoqarfiit tamarmik 23-t (nunaqarfiit) eqqagassalerinermut pilersaarutitigut siunissami illoqarfinni sulisut suleqatigalugit makku isumaginissaat akisussaaffigilissavaat
- Eqqakkanik katersineq, suliarinninneq immikkoortiterinerlu
- Eqqakkat eqqiluisaartumik inissinneqarnissaat tipi niviukkallu pinngitsoortinniarlugit
- Nammineq eqqakkat umiarsuakkut inoqarfinnut (illoqarfinnut) anginerusunut nassiuttarnissaat
Avannaata Kommuniani eqqagassanik suliaqartut ingerlaavartumik atortunik pitaanerusunik tunineqartarput. Ass. 2025-mi ATV-t larveføddellit/assakaasullit aasakkut ukiukkullu atorneqarsinnaasut pisiarineqassapput.
Qamutit maskiinallu pisiarineqareertut saniatigut sulisut maskiinat atornissaannut namminnerlu iluarsaannissaannut ilinniartinneqassapput.
Ullumikkut unammilligassaq tassaavoq inoqarfiit minnerusuni ikitsuinnaat umiarsuavileqarnerat, taamaasilluni nunnigussissutit pisiarineqassapput avannaani illoqarfinnut eqqagassanik aallernermi assartuinermilu atorneqartartussat.
Annerusumik atoqqiineq
Eqqagassalerinermut pilersaarummi ullumikkornit eqqakkanik immikkoortiterinerunissaq atoqqiinerunissarlu ukkatarineqarpoq. Sumiiffinni arlalinni saviminikut immikkoortiterneqartalereerput Danmarkimullu nassiunneqartarlutik tuneqqinnissaat atoqqinnissaallu siunertaralugu. Aalisarnermi atortut soorlu ningittakkat qassutillu toqqaannaq Ilulissat umiarsualiviani Big-Bags-inut immikkoortiterneqartarput. Illoqarfiit nunaqarfiillu arlaqartut ningittakkanik assigisaanillu immikkoortiterisinnaaneq soqutigisaqarfigalugu ersersereerpaat, tamannalu ukiuni aggersuni pisinnaalernissaa naatsorsuutigineqarpoq. Aalisarnermut atortut atoqqinneqarnissaannut aamma Danmarkimut nassiunneqartarput.
Kiisamilu Qaanaami tigooraavimmik pilersitsisoqarsimavoq arfineq-pingasunik containeritalimmik eqqakkanut assigiingitsunut atorneqartussanik. Inissiisarnermut pitsanngoriaataallunilu aallertarnermut pitsanngoriaataavoq.
Piffissami matumani Avannaata Kommunia kommunit allat peqatigalugit immikkut akuersissummik tunineqarnermikkut juni 2025-p tungaanut eqqakkanik ikuallaasinnaapput. Aaqqissuussaq tamanna utaqqiisaasumik aaqqiissutaavoq. Immikkut akuersissut uani itinerusumik atuarsinnaavat:
Midlertidig dispensation til åben afbrænding i 25 byer og bygder i Avannaata Kommunia
