Ilulissani takornarissanik sullissisorpaaluit aamma inuussutissarsiutillit aningaasaqarnikkut annertulaartumik annaasaqarnissartik ilimagivaat, umiarsuit takornariartaatit Ilulissat sanioqqutiinnassappassuk.
”Avannaata Kommuniani politikkikkut siammasissumik isumaqatigiissutigineqarpoq takornariaqarnikkut inuussutissarsiorneq ineriartortinneqarnissaa sulissutigineqassasoq, taamaasilluni najukkami takornarialerisut aamma innuttaasunut tamanut pitsaasumik pissarsiffigineqarsinnaaniassammat. Taamaammat tamatta suleqatigiinnissarput, oqaloqatigiinnissarput aamma ataqqeqatigiinnissarput pingaaruteqarpoq,” borgmesteri Palle Jerimiassen (D), Avannaata Kommunianit oqarpoq.
Ilulissani najukkami takornarialerisut umiarsuit takornariartaatinik sullissisartut aamma umiarsuit takornariartaatit Ilulissanut tikinnissaminnut pilersaaruteqartut akerliussutsimik takutitsiviginiarneqarnerannut mianersoqqusinerat annilaanganermit aallaaveqarpoq.
Qanittumi ataatsimeersuarnermi ’Cruise Forum’ Ilulissani ingerlanneqartumi umiarsuit takornariartaatilerisut aamma sullissisut akornanni eqqartorneqarpoq, siunissami umiarsuit takornariartaatit illoqarfimmut tikikkaangata najukkami sullissisut atorneqartarnissaat qanoq isumannaarneqassanersoq.
”Kisianni tikeraatta takornariallu nalornissutigissanngilaat maani avannaanut tikilluaqqusaallutik. Naapertuuttumik ersarissumillu unammillernerit pinissaat kissaatigaarput, taamaasilluta sullissisut tamaasa akimorlugit najukkami piujuaannartitsisumik takornariaqarnermut inuussutissarsiornermik ineriartortitsiniassagatta” Palle Jerimiassen oqarpoq.
Borgmesteri ulluni kingullerni najukkami takornarialerisunit mikinerusunit saaffigineqaqattaarpoq, taakku angallatinik atortunullu allanut annertuumik aningaasaliissuteqarsimapput umiarsuit takornariartaatit 2025-mi Ilulissanut tikinnissaat naatsorsuutigalugu. Takornarialerisut allat oqaluttuaraat umiarsuarni takornariartaatini ilaasut angallanneqarnissartik aamma qimussiunneqarnissartik taamaatiinnarsimagaat aamma isertitassaraluaminnik appariaateqarnissartik takorlooreersinnaanerarpaat.
”Umiarsuit takornariartaatit Ilulissat sanioqqullugu angalasassappata tamanna ukioq naallugu takornarialerinermik inuussutissarsiuteqartut suliffeqarfiutiminnik inerisaanissaminnut kissaatillit annertuumik aningaasaqarnikkut kingunerluuteqassapput.
Aamma suliffeqarfiutillit, katersugaasiviit peqatigiiffiillu umiarsuit takornariartaatinit isertitassaraluaminnik annaasaqarnissartik toqqissisimanarinngilaat.
Avannaata Kommuniani politikkerit kissaatiginngilaat najukkami sullissisut umiarsuarnut takornartaatinut ingerlatseqatigiiffinnit imaluunniit sullissisunit ataasiakkaanit aqunneqassasut. Ilulissat, takornariartarfittut ineriartortutut kikkullu tamarmik akimorlugit suleqatigiiffiusutut ineriartornera ingerlaannassaaq, taama borgmester Palle Jerimiassen (D) isumaqarpoq.
