Ukiut arfineq pingasut Avannaata Kommunianeereerlunga taamaatissaanga
2017-imi taamani kommunerujussuaq Qaasuitsup Kommunia marlunngorlugu avinneqarpoq, Avannaata Kommunia aamma Kommune Qeqertalik pilersinneqarlutik.
2017-ip ukiaani atorfinippunga, taamanikkullu kommuni nutaajuvoq, teknikkeqarfimmilu pisortaasussaallunga. Immikkut eqqaamavara kommuni tamakkerlugu eqqagassalerinerup tungaatigut ajornartorsiutit angisuut piusut. Taamanikkut eqqakkat qanoq ilillugit suliarineqartarnerat allanngortiteriffigilerparput. Suliap peqataaffiginera soqutiginarsimavoq pissanganarsimallunilu.
Tamatuma saniatigut kommunimi illoqarfiit ineriartortinneqarnissaannut pilersaarutit assigiinngitsut suliarisimavagut, tamatumanilu peqataasinnaasimagama uannut tamanna pisinnaatitaaffiusimavoq tulluusimaarutigisara. Ilikkagaqarnartorujussuusimavoq, pingaartuusimavorlu suleqatit nuannersut pikkorissullu suleqatigisimagakkit.
2019-imi ukiaaniilli kommunaldirektøriusimavunga. Piffissaq ingerlapallassimavoq ukiullu tallimat ingerlariikatassimapput. Kommunimut peqataasimavunga sorpassuartigut ineriartorsimasumut pissanganarsimaqaarlu ineriartornermut sunniuteqaqataaneq. Kommunaldirektøritut akisussaaffik annertoorujussuuvoq Kommunalbestyrelsilu sulisitsisorivat.
Piffissamut aalajangersimasumut atorfeqartitaanera februaarimi naavoq, taavalu isumaqatigiissutiga ukiunik pingasunik sivitsorneqarpoq. Sulinngiffeqaqqammerpunga, sulinngiffeqarnermalu nalaani piffissaqarsimavunga nalilersuilluarnissannut. Malungisinnaavara piffissanngorsimasoq ingerlariaqqinnissannut, taamaattumillu qinerpara ukiamut atorfinnit tunuassallunga. Pissanganarsimaqaaq nuannersimaqalunilu Avannaata Kommuniani suleqatit pikkorissut taama amerlatigisut suleqatigisimaneri.
Inussiarnersumik
Nick Nielsen
