Avannaata Kommuniata ukioq kaajallallugu takornariaqarneq aallunniarlugu ukkatarilerpaa. Takornarialerisartut 40-t angunngilaarlugit ulluni marlunni saqqummiinerpassuarnik, oqallinnertaqarluartumik isumassarsianillu ineriartortitsinermik imaqartunik workshoppertitsinermut peqataapput.
Ullumikkut takornarissat Avannaata Kommuniata sumiiffiinut qaammatini pingasuni aasaanerata nalaani takornariartarput, ingammillu Ilulissanut takornariartarlutik. Tamanna ukiuni aggersuni allanngortinneqarsinnaalissaaq. Ilulissani mittarfissuaq nutaaq 2026-imi ammarneqartussaavoq, ilutigisaanillu ukioq kaajallallugu takornariartitsisarsinnaanerup ineriartortinnissaanut periarfissat ammaanneqarput aammalu kommunip avannarpasinnerusortaani takornariartitsisarneq annertusarneqarnissaanut periarfissiissaaq.
"Takornariartitsineq kommunimut tamarmut suliassaqarfiuvoq pingaarutilik. Inuusuttut piginnaasaqalersinnaanerat ilinniagaqalersinnaanerallu qulakkiissavarput, taamaasillutik inuussutissarsiutaasumi sulilerniassammata. Sumiiffikkaani takornariartitsisarneq pillugu kivitseqatigiinnissatsinnut ataatsimoorfeqartariaqarpugut", taama borgmesteri Lars Erik Gabrielsen (S) Ilulissani ulluni marlunni workshoppertitsisoqarmat peqataanermini oqarpoq.
Mittarfik nutaaq attaviillu nutaat
Pilersaarut malillugu saqqummiisut pingaarutillit peqataanikuupput.
Greenland Airportimit oqaluttuarineqarpoq, 2026-mi novembarimi Ilulissani nunanut tamalaanut mittarfik ammassasoq. Tamatumap kingunerisaanik assersuutigalugu Københavnimit Ilulissanut toqqaannartumik timmisartuussisoqartalissaaq – timmisartuussinernullu ilaasussat nuannersunik misigisaqarnissaminnut sinnattuaqisunik ulikkaarniartussaassapput.
Air Greenlandimi pisortaaneq, Jacob Nitter Sørensen timmisartuussisarnissamut pilersaarutaagallartut pillugit saqqummiussaqarpoq. Sapaatip akunneranut pingasoriarluni timmisartuussisoqartarnissaa Air Greenlandip naatsorsuutigaa timmisartuussinernullu ilaasartussat ’ulloq angalaffimmini apuuffissaminnut timmisartumik ingerlariaqqinnissaminnut attavissaqarnissaa’ qilanaarisinnaavaat, imalu paasineqarsinnaassaaq Ilulissaniit aallaraanni ulloq taanna aamma Europamut Skandinaviamullu apissittoqarsinnaalissasoq.
”Kisianni aamma aningaasaqarnikkut akilersinnaassappat, taava timmisartut ukiuunerani ulikkaaqqasassapput. Taamaammat tamatta Kalaallit Nunaata Avannaata nittarsaannissaanut aammalu ukioq naallugu orniginartunik neqerooruteqartitsisalerrnissatsinnut akisussaaqatigiippugut," taama Air Greenlandimi pisortaaneq Jacob Nitter Sørensen oqarpoq.
Aningaasaqarnikkut ineriartortitsineq aallarnisaanerlu
Ineriartortitsineq aningaasaliinermik piumasaqaateqarnermik aammalu suliffeqarfinni aningaasaqarnikkut peqqinnartumik ineriartortitsinissamik malitseqarpoq. Tamatumap sammineqarnerani peqataasut periarfissanut marlunnut tunngasunik saqqummiivigineqarput, tassaallutik GrønlandsBANKEN aammalu Namminersorlutik Oqartussat ineriartortitsinermut ingerlatseqatigiiffiutaa, Nalik Ventures.
”Namminerisamik suliffeqarfiutigisamut pitsaasumik niuernissamut pilersaaruteqarnissaq pingaaruteqarpoq", taama GrønlandsBANKENimi inuussutissarsiornermut pisortaq Søren Stenberg oqarpoq. Avannarpasinnerusumi suliffeqarfiiit akornanni Bankip pingaarutilittut peqataanissani soqutigisarivaa aammalu aningaaserivimmi sullissineq nutaaq neqeroorutigisinnaanngussavaa – imannak taaguuserneqartussaq ’takornarialerisunut taarsigassanik atukkiussineq’, inuussutissarsiorfiusumi takornarialerisunut atukkiusseriaasiussalluni.
Aammattaaq Thomas "Tyt" Mogensenip, Nalik Venturesimi pisortap aallarnisaasunut tapiisuteqarnissamut periarfissat oqaluttuarai – tamatumunnga ilanngullugit siunnersuineq, annikitsunik taarsigassarsiat, immikkut ilisimasalinnit ikiuinerit aammalu suleqatigiinnissat. Nalik Venturesip nittartagaani sakkussat videollu nassaassaapput, taakkuuppullu suliffeqarfimmik nutaamik aallartitsinissamut pisariillisaataasussat.
Avannaanit oqariartuutit: Uummannaq Upernavillu eqqartorneqarput
Avannaata Kommunia avannaaniit takornarialerisartut workshoppertitsinermut peqataanissaminnut kissaateqartut angalanissaannik unnuiffissaannillu tapiiffigineqarput.
Taakkunanit peqataasoq tassaavoq Uummannameersoq Paaluk Kreutzmann:
”Siunissami pilersaarutaasut pillugit toqqaannartumik paasissutissiivigineqarnissaq ilisimasaqalernissarlu uatsinnut pingaaruteqarpoq. Nutaamik mittarfittaarutta takornarissallu amerlippata, taava uagut avannarpasinnerusumiittugut amerlanerusunik takornariaqalernissatsinnut periarfissaqarlualissaagut."
Duda Sørensen Upernavik Accomodationsiminngaanneersoq suliassaqarfimmini unammilligassat aalajangersimasut ersarissarpai: Neriniartarfinnit neqeroorutit amigaataasut, timmisartuussisarnerit taamaatinneqakulasut aammalu pisinniarfinni ikippallaanik akisuallaanillu nioqqutissaqarnera.
”Takornariatsinnut pinngortitami misigisassanik neqeroorutissarpassuaqarpugut. Kisiannili sinaakkutissat pitsaavallaanngillat. Taamaammat tusaaneqarnissarput pingaaruteqarpoq – isumaqarpungalu maanna tusaaneqarsimallunga", taama Duda Sørensen Upernavimmi peroriartortoq oqarpoq.
”Sumiiffik pillugu ilisimasarpassuaqarpunga takornarissallu uagut nunaqavissuusugut naapikkusuttarpaatigut"
Siunissami Avannaani takornariaqartitsisarnissaq
Borgmesterip Lars Erik Gabrielsenip takornariaqarnerup annertusarneqarnissaanik suliaqarneq nangissallugu qilanaarivaa:
”Pitsaanerusunik suliffeqarfinnik pilersitserusuppugut sumiiffinnilu aningaasanik isaatitsinissaq kissaatigalutigu.
Ataatsimoortariaqarpugut taakkulu uagullu akornitsinni avissaartuunnissaq pinaveersaartittariaqarparput. Avataaniit nukiit piupput sumiiffinnilu pitsaanerusumik oqaloqatigiissinnaassaagut, taamaasilluta innutttaasugut nuannaassapput, takornarissat naammagisimaassapput suliffeqarfiillu nukittuujussallutik", taama borgmesteri oqarpoq.
Workshoppertitsinermi aamma oqariartuut pingaarutilik tassaavoq, nittarsaassineq piffissaq eqqorlugu ingerlanneqartarnissaa: Ukiukkut angalanissaq aasaanerani aalajangerneqartarpoq – paarlattuanillu. Taamaammat siunissami timmisartuussisarnissat malitsigisaanik, ukioq kaajallallugu takornariartussarpassuit kajumilersinniarlugit Kalaallit Nunaata Avannaa ukioq naallugu ersarissuussaaq.
Visit Greenlandimit periusissiartik aammalu aaqqissuussaanermi paasissutissiissutit inissisimaffiiniittut pillugit oqaluttuarput. Assersuutigalugu video "Greenland Googles 2.0", Kalaallit Nunaat piviusorsiorfiusunik siumullu ilimagereerneq ajortunik misigisassarpassuaqarneranik ersersitsivoq.
Filmi tigulluarneqarpoq, peqataasullu arlallit takusassiartalimmik oqaluttuameersunik namminneq neqeroorutiminnik isumassarsiaminillu ilisarinnissinnaapput.
Avannaata Kommuniani ukioq kaajallallugu takornariartitsisarnerup inerisarnissaanut suliaqarnissamut ilanngussarpassuit, oqaatigisat apeqqutillu suleriarnissami ilanngunneqassapput.
Qujanaq: Moderator Navigator / Allan Chemnitz.
Allaaserisaq Avannaata Kommuniani 2025-imi maajimi takornariaqartitsinermut workshoppertitsinermit ingerlanneqaqqammersumit imarisanit aallaaveqarpoq.
Filmi Visit Greenlandimit uani takujuk: Greenland Googles 2.0
