Ilinniartitaanerup pilersinneqarnera kommunip Upalungaarsimanerata pitsaassusaanik kivitsineruvoq pingaarutilik, peqataasut inunnik amerlasuunik ajoqusertoqartillugu suliaqarsinnaalernissaannik siunertaqartoq. Ilinniarneq upernaaq manna 26. maajimiit 9. juunip tungaanut ingerlanneqarpoq.

Inuppassuarnik ajoqusersimasunik ikiuingasuarsinnaaneq iliuuseqarfiginninnerlu pillugit ukkassineq.

Ilinniartitaanerup taassuma nutaap immikkut ukkassiffigaa ajutoornerni annertuuni, inunnillu amerlasuunik ajoqusertoqarsimatillugu, passussivissanik pilersitsinissaannut ingerlatsinissaannullu qatserisartut piareersassallugit. Ilinniartitsinermi ilaapput ilaatigut piviusuusaartitsinerit makku, timmisartut nakkarnerini, takornariartaatit umiusut, angallatit taxatut atorneqartartut kinngusimasut kiisalu pisut allat ataatsikkut inuppassuarnik ajoquserfiusut.

Ilinniarfimmi peqataasut qatserisartut, holdlederit  suliniummillu aallartitsisussat ilanngullugit, annertuumik ajutoortoqartillugu sukumiisumik iliuuseqarfiginissaannut sungiusarneqarput. Kiisalu atuartitsinerup ilagaa ajoqusernerit assigiinngitsut, amerlanertigut taama pisoqarnerani pisartut, pissutsini ilungersunartuni suliaqarnissaanni sakkussaannik tigussaasunik tunniussuineq.

Inuit ajoqusertut siulliullugit erniinnaq passunneqartussaapput. Passussinermi piffissaq apeqqutaalluinnarpoq.
​

Ilinniartitaanermi immikkut ilisimasallit

Ilinniartitaaneq Jesper Stenbakken KOVIDA-mit aamma Søren Korsgaard SK Care-imit ineriartortinneqarlunilu ingerlanneqarpoq. Ilinniartitsisut marluullutik Upalungaarsimanermut tunngasunik annertuumik misilittagaqarput ukiunilu arlalinni sineriak tamakkerlugu qatserisartoqarfinni suleqatit amerlasuut atuartitarisimavaat. Peqataasut suliaminnut ilisimaligaat misilittagaasalu pisunut sakkortuunut sapinngisaq tamaat isumaginnissinnaanernut piareersarneq qulakkeerpaat.

Upalungaarsimanermut tunngatillugu ilinniartitsisut taakku marlullutik Ilulissat ilisimalluarpaat. ”Assut iluatsitsisimaarpunga” Jesper Stenbakken KOVIDA-meersoq oqarpoq.

”Ukiuni 20-nngulersuni Kalaallit Nunaanni Upalungaarsimaneq pillugu suliaqartunik suleqateqartarnikuuvunga, kujataani Qaqortumiit avannamut Ilulissat tikillugu". Suleqatigut kalaallit piginnaasaqarput pikkorillutillu. Nunami issittumi Upalungaarsimaneq pillugu misilittakkaminnik avitseqatigilluarpaatigut, taannaavorlu suleqatigiinnitta ilisarnaataa. Assigiimmik naleqartinneqarneq suliatigullu avitseqatigiumanninneq aamma inuttut misilittakkanik imminnut ilisimatitseqatigiinneq.

Naak ukiorpassuit maani Upalungaarsimaneq pillugu suleqateqaraluarlunga suli Kalaallit Nunaanni qatserisartutut sulineq ilinniarfigisussaavara. Taarsiulluguli Danmarkimit misilittakkakka atorlugit tunniussaqarsinnaavunga".
​

Siunissaq pillugu kivitsineq pisarialik

Ilinniartitaanerup matuma immikkut ittumik pisariaqassusaanik takunnissimasoq tassaavoq  Upalungaarsimanermut pisortaq Isak Pjettursson. Avannaatalu Kommunianit suliniut tapersersorneqarpoq.

”Aasap ingerlanerani takornariat amerliartornissaat ilutigalugu aammalu Ilulissani mittarfittaassarsuup anginerup ammarneqarneranut atatillugu apeqqutaalluinnarpoq Upalungaarsimanerup sapinngisamik nukittuujunissaa."

Tarnip pissusaanik ikiueqqaarneq passussinermi pingaaruteqarluinnarpoq.

"Pitsaanerpaamik piareersimanissaq pillugu akisussaaffeqarpugut pingaartumik allannguutit  unammilligassallu annertoqisut siunissami qaninnermi pisussat pillugit," Isak Pjettursson oqarpoq. "Ilinniartitaaneq una Upalungaarsimanitsinnut aningaasaliineruvoq, pisinnaasanik piginnaanernillu pingaarutilik."

Avannaata Kommuniata suliniuteqarnermigut takutippaa Upalungaarsimaneq pillugu nukittuumik ilinniagalinnillu Upalungaarsimasuutitaqarneq  qanoq pingaaruteqartigisoq, nunaqavissunut tikeraanullu ajutoornernik nalaataqarnermi isumaginnikkasuarsinnaaneq isumannaallisaanerlu pingaaruteqarmata.