- Inuusuttut pillugit iliuuseqartariaqarpugut, sumiiffissaaleqipput oqaloqatissaaleqillutillu. Inuk ataasiinnannguarluunniit annertuumik allanngortitseqataasinnaavoq, unnuk ataaseq kajumissutsiminik suleqataanermigut timersortarfimmi ornittakkaniluunniit allani, taama oqarpoq Avannaata Kommuniani borgmesteri, Lars Erik Gabrielsen.
Ilaatigut Qaanaami Ilulissanilu timersortarfiit unnukkut unnuakkullu maanna ammatinneqartalerput, taamaalilluni amerlanerusut timersoriarnissaminnut periarfissinneqarlutik. Timersortarfik sulisoqarpoq, sulisumullu saaffiginnittoqartuaannarsinnaavoq, arlaannik ikiortariaqaraanni siunnersorneqarusukkaanniluunniit, imaluunniit arlaannukarusukkaanni ilisarisimasanik naapitsiviusinnaasumut.
Tassami Avannaata Kommuniata paasisimavaa, tillinniarnerit, nakuusernerit, naamaarniarnerit pinerlunniarnerillu allat aasap qaammataani akulikinnerusumik pisartut. Piffissamilu tassanerpiaq sunngiffimmi sammisassaqartitsiniutit ornittakkallu amerlanerpaat matoqqasarput aasaanerani sulinngiffeqarneq pissutigalugu.
Tamanna allanngortinniarneqalerpoq, taamaalilluni pinaveersaartitsinermik suliaqarneq aasaanerani aamma ingerlanneqartalissalluni. Ilaatigut sunngiffimmi klubbit unnukkut ammasassapput, taamaalilluni unnuakkut kingusissukkut inuusuttut ornitassaqarsinnaaqqullugit.
Maaji Peqqissuugit ukioq kaajallallugu
Peqqinneq Sunngiffillu Maaji Peqqissuusamut atatillugu ukiut tamaasa qaammat ulikkaarlugu pilersaarusiortarpoq, tamannali annertusineqarpoq, qaammatit sinneri qaammatikkaartumik pilersaarusiorfigineqartalissallutik, illoqarfinni assigiinngitsuni innuttaasut taamaalillutik sammisassanik nassaarsinnaajuaannaqqullugit.
- Pinaveersaartitsineq kommunip sulinerata ilagivaa pingaarutilik. Kommunitsinni innuttaasut tamaasa kaammattorujussuppakka pinaveersaartitsilluni suliniutini peqataaqqullugit. Amerlasuutigut peqatigiiffiit assigiinngitsunik suliniuteqarnissaat utaqqiinnarneqartarpoq, kissaatigivarali, ataatsimoorluta kivitseqatigiinnissarput. Taamaaliornitsigut nukittunerpaassaagut, amerlanerillu ikiorsinnaallugit" Lars Erik Gabrielsen, Avannaata Kommuniani borgmesteri taamatut kaammattuuteqarpoq.
Aamma kulturikkut aaqqissuussinerit innuttaasut ataatsimoornerinik nukittorsaassapput. Aasaq manna Inuiattut ullorsiornitsinni 21. juuni nutaatut ullut pingasut aaqqissuussisoqarpoq, kulturikkut pikialaartitsinerit assigiinngitsut ingerlanneqarlutik, ullunut pingasunut agguataarlugit. Kommunalbestyrelsip kissaatigaa, siunissami inuiattut ullorsiortarnerput ulluni arlalinni malunnartinniarneqartassasoq.
Eqqarsaataavoq sulisut piumassutsiminnillu suliaqartut meeqqanut inuusuttunullu ulluinnarni oqilisaasseqataassasut illoqarfimmi susassaqartitsinernik amerlisaanikkut.