Kangersuatsiaq, Upernaviup kujataaniittoq, tunngavilerneqarnerminit ukioq manna ukiunik 200-nik nalliuttorsiorpoq. Tamanna malunnartiniarlugu persuarsiutaasumik arfininngornermi juulip ulluisa 26-anni malunnartinneqarpoq.
Avannaata Kommuniani borgmesteri, Lars Erik Gabrielsen (S) tamanna pillugu ima oqaaseqarpoq:
”Kangersuatsiap piunera inoqarfinnut allanut sanilliullugu sivisuvoq. Taamaattumik Kangersuatsiami najugallit nunaqarfimmullu attuumassutillit tamaasa qamannga pisumik pilluaqquakka,” Avannaata Kommuniani borgmesteri oqarpoq. Nangipporlu:
”Nunaqarfimmi inuussutissarsiornikkut periarfissat pitsaanerulernissaat neriuutigaara. Assersuutigalugu aalisakkeriveqarnikkut. Kangersuatsiami ukiuni 15-nngulersuni aalisakkeriveqannginnera nunaqarfiup inuerukkaluttuinnarneranut peqqutaaqataanera ajuusaarnartuuvoq.
Taamaattorli inuussutissarsiornikkut atukkat allatigut pitsaanerulersikkumallugit siunnertoqassappat sinaakkusersueqataanissamut pisussaaffeqarlunga misigisimavunga.”
Borgmesterip Kangersuatsiap nalliuttorsiutigineqarnerani peqataanissaa pilersaarutaagaluarpoq. Silaannakkulli angallannermi pilersaarutit allanngornerat peqqutigalugu tamanna piviusunngorsinnaanngimmat, Lars Erik Gabrielsenip uggoraa.
Nunaqarfinnut aqutsisunut ilaasortaq: Ukiut amerlasuut anguagut
Upernavik Kujallermi Kangersuatsiamilu Nunaqarfinnut Aqutsisunut ilaasortat arlallit peqataapput. Taakkununnga Edvard Kristiansen (N) akuuvoq.
Taanna nunaqarfimmi Kangersuatsiami najugaqarpoq, nunaqarfinilu pillugu ilaatigut ima oqaaseqarpoq:
”Tamassi nalliuttorsiornitsinni pilluaritsi. Oqaluttuarisaanerput malillugu 200-it amerlasoorsuupput. Kangersuatsiap suli ukiorpassuarni napanissaa neriuutigeqaara,” Upernavik Kujallermi Kangersuatsiamilu Nunaqarfinnut Aqutsisunut ilaasortaq, Edvard Kristiansen (N) oqarpoq.
Ullormi pisut
Kangersuatsiami persuarsiutaasumik ullormi ullaap tungaani aappalaartulertoqarpoq. Nunaqqatigiit ullaakkorsioqatigiillutillu naalagiaqatigiipput, taassuma kingorna iliveqarfimmi naasortaliisoqarpoq. Nunaqqatigiinnut ullukkut kaffillertoqarpoq unnukkullu nereqatigiittoqarluni.
Jens Napãtôk' (N) Knud Kristiansenilu (S) Avannaata Kommunia sinnerlugu peqataapput.
Kangersuatsiaq ukiup aallartinnerani 118-inik inoqarpoq.
