Avannaata Kommuniani borgmesterip Lars Erik Gabrielsenip (S) kissaatigaa Kujataani qarmaasumik Siku-Block-iliortarsimasup suleqatiginissaanut periarfissat misissorneqarnissaat.
Siku-Block-imik piginnittoq Jakob F. Knudsen Kujataanilu qarmasissianik tunisassiorsimasoq, naapertorlugu qarmasissiat pitsaassusiat qaffasittorujussuuvoq, imminullu akilersinnaassusianik naatsorsuutit takutippaat, niuerfinni unammillersinnalluartut. Jakob F. Knudsenip ilanngullugu erseqqissarpaa, qarmasissiaq oqummit saassunneqarneq ajortoq, aserfallatsaalisassaaneq ajortoq, taamaattumillu aningaasaliiffigisaq ninngusuujusoq attartuujusorlu.
Taamaattumik illuutilinnut aningaasartuutikinnarneruvoq, assersuutigalugu kiassarnermut aningaasartuutit eqqarsaatigalugit, kiisalu illup iluani silaannaq pitsaanerulluni, pissutigalugu illumi Nunatsinni qarmasissiaq atorlugu sanaajusumi ingerlatsineq akikinnerussammat, illunut qisuit atorlugit sananeqartartunut sanilliullugu.
Tamatuma saniatigut Siku-Block-ip aamma sanaartorpai qarmasissiat (flisit) nunaqarfinni aqquserngit pitsanngorsarneqarnissaannut atorneqarsinnaasut. Taamaattumik aqquserngit qallersorneqarnissaat pillugu suleqatigiinneq aamma ilaneqarsinnaavoq, taamaaliornikkullu nunap immikkoortuani nunaqarfinni attaveqaasersuutitigut pilersaarutit nukittorsarneqarsinnaallutik.
Ineqarnerup tungaatigut Nunarput aserfallatsaaliuinissap nutarterinissallu annertoorujussuit maanna saavanniippoq. Kalaalllit qarmasissiaat atoraanni najukkami suliffissat qulakkeerneqaannassanngillat atortussanillu tikisitsineq annikillineqaannassanngilaq, aammali Nunatsinni aningaasaliinerit piujuartitsinermik tunngaveqartut pilersinneqarsinnaapput.
Taamaattumik Avannaata Kommuniani borgmesterip kissaatigaa, Siku-Block-imik suleqatigiinnissamut isumaqatigiissusiortoqarnissaa, nutaanik inissialiortiternissaq siunertaralugu, immaqalu Nunatsinni qarmasissiat atorlugit nunaqarfinni aqquserngit pitsanngorsarneqarnissaat ilanngullugu.