Siunertaavoq illoqarfik tamakkerlugu katersuuffiusinnaasumik pilersitsinissaq. Pilersaarut, utaqqiisaasumik Pikialaarfimmik taagorneqartoq, timersornerup saniatigut allarpassuarnut atorneqarsinnaassaaq.
Pileqqaarneranit takorluugaavoq, issiavinnik kaassuartakkanik atuisuniit aanaakkut/aanaakkut ilanngullugit, ernuttaminnik unammisunik isiginnaariarumasut naapiffigisinnaasaannik, peqataaffigisinnaasaannik ataatsimoornermillu nukittorsaaffiusinnaasup pilersinneqarnissaa.
Kommunimiit neriuutigineqarpoq illorsuup kommunip karsianit aningaasaateqarfiillu tapiissutaannit aningaasalersorneqarsinnaajumaartoq.
Pilersaarusiaq naammassippat, kommuni aningaasaateqarfinnut tulluartunut qinnuteqaatinik nassiussissaaq.
Avannaata Kommunia sanaartortitsisuussaaq, pilersaarusiarlu ineriartortissimallugu Lokale og Anlægsfonden (LOA) aamma Qarsoq Tegnestue suleqatigalugit. Illorsuaq sammisaqarnermut peqatigiinnermullu aqqutissiuussissaaq, timi atorlugu timersornerinnaq aqqutiginagu, kisianni aamma ulluinnarni sammisat aqqutigalugit, soorlu nerrivimmi arsaararneq, inukkanik pinnguarneq kaffinnguamilluunniit najoqqaaneq eqqarsaatigalugit.
Pilersaarummut pingaarutilittut ilaatinneqarpoq Naapiffik, tassa ini oqaloqatigiittarfik, inuit assigiinngitsunik tunuliaqutallit naapiffigisinnaasaat misilittakkanillu avitseqatigiiffigisinnaasaat. Tamatuma saniatigut illorsuaq angisoorsuunngikkaluartumik igaffeqassaaq, kulturikkut atuartitsiviusinnaasumik soqutigisaqaqatigiillu ataatsimoorlutik nerisassiorfigisinnaasaannik.
"Illumik ammasumik kajungernartumillu pilersitsinissaq kissaatigaarput, kikkulluunniit tikilluaqquneqartutut misigiffigisinnaasaannik.
Illorsuarmik sananissaq matumani kisiat eqqarsaatigineqanngilaq, kisianni ataatsimoornerup nukittorsarneqarnissaa pineqarpoq," Borgmesteri Lars Erik Gabrielsen (S) oqarpoq.
Multihalissaq tikikkuminarsakkatut titartarneqarsimavoq, taamaalilluni issiavinnik kaassuartakkanik atuisut inuillu immikkut pisariaqartitsisut allat naligalugit peqataasinnaanissaat periarfissaqassallutik. Illorsuaq qaamasuussaaq, kialaarluni kajungernarlunilu, pilersaarutaavorlu siunissami pissusissamisuuginnartumik naapiffiusalerumaarnissaa.