Taamaattumik borgmester Lars Erik Gabrielsenip (S) innuttaasut tamaasa, katerisimaarluni nuannataarnerni misigissutsinik tiguartinnginnerminni akisussaaffimmik tiguseqqullugit eqqarsarluaqqullugillu kajumissaarpai. "Nuannisakuttoorsinnaavugut nalliuttorsiualaarnermilu nuannersumik peqataalluta, tamannali ima ingasatsigilissanngilaq, allaat meeqqanut inuusuttuaqqanullu toqqissisimanarunnaarluni."
"Nalunngilarput politiit, qatserisartut ambulancellu sapaatip akunnerata naanerani maanna annertunerusumik ulapaarumaartut. Taamaattumik innuttaasutut ataatsimoorluta immitsinnut paarinissarput pisariaqarpoq. Sanngiinnerusut allatut isigiumanagit, ataatsimoornissarli takutikkusullugu, kinaluunniit kisimiissanngimmat," taama oqarpoq borgmesteri Lars Erik Gabrielsen (S).
Borgmesterip erseqqissarpaa immikkut pingaaruteqartoq meeqqanut inuusuttuaqqanullu, tamatigut toqqissisimanartumut angerlarfissaqartanngitsunut, toqqissisimanartunik sinaakkutissaqarnissaq. Taamaattumik innuttaasutut annertunerusumik akisussaaqataanermik amerlanerusut tiguseqataanissaat kaammattuutigaa. "Immaqa unnuakkut illoqarfik biilerluni kaajallaqqilaarlugu imaluunniit ataatsimoorluni unnuarissat piumassutsiminnik sulisartut assigalugit pisuttuarluni. Imaluunniit inersimasutut toqqissisimanartutut pilluni, meeqqap atorfissaqartitsinermini saaffigisinnaasaatut," borgmesteri oqarpoq.
"Ajornanngitsuararsuuvoq pisortat akuliunnissaat utaqqiinnassallugu. Kisianni aamma ataasiakkaarluta immitsinnut qiviartariaqarputut aperalutalu, pissutsit pitsaanerulersinniarlugit qanoq iliorsinnaanerluta. Innuttaasutut ataatsimuuleraagatta sunarujussuaq aaqqissinnaasarparput," Lars Erik Gabrielsen (S) erseqqissaavoq.
Ilanngullugu kaammattuutigaa, aningaasat kontomut nakkartut pillugit ungasinnerusoq isigalugu eqqarsartoqaqqullugu: "Immaqa ilaat toqqorallarneqarsinnaapput, umiatsiamullu kissaatigiuarneqarsimasumut atorlugit," borgmesteri oqarpoq.
Peqatigitillugu borgmesterip eqqaasitsissutigaa, ikiortissamik aallerfissaqartuaannarmat, sapaatip akunnera sapernarpallaalissagaluarpat.
Tusaannga ammavoq nalaarnissamut ikiuunnissamullu piareersimalluni.
Sms Tusaannga 1899 Tusaannga-mut sianerit 80 11 80 aamma tusaannga.gl-imut iserlutit chatte-qateqarsinnaavutit allagaqarlutilluunniit.
Oqariartuut ersarippoq: Imminut immitsinnullu paarissaagut.
Politiit, Qaanaaq: 70 14 28
Politiit, Upernavik: 70 14 27
Politiit, Uummannaq: 70 14 26
Politiit, Ilulissat: 70 14 22