Europa-Parlamentip Aalisarnermut ataatsimiititaliaanit aallartitat Kalaallit Nunaannut tikeraarput. Angalaqatigiit Ilulissaniinnerminni borgmesteri Lars Erik Gabrielsen (S) naapippaat.
Politikerit EU-meersut assersuutigalugu annerusumik paaserusuppaat, Kalaallit Nunaata EU-llu akornanni suleqatigiinneranni avannaa pillugu sunik naatsorsuutiginnittoqarnersoq. Apersuutigineqarportaaq inuiaqatigiit nunaqarfeeqqaniittut ineriartortinniarnerini unammillernartut anginerpaat suunersut aamma inuusuttunut siunissaq qanoq isikkoqarnersoq.
"Avannaani inuiaqatigiit mikisut aalisartullu ulluinnarni atugarisaat paasissallugit pingaaruteqarpoq," Aalisarnermut ataatsimiititaliami siulittaasup tulliusoq Kalaallit Nunnaannullu tikeraarnermi siuttuusoq Sander Smit oqarpoq.
Borgmester Lars Erik Gabrielsenip (S) isummani naapertorlugu immikkut suleqatigiissutigissallugit piukkussani pingasut tikkuarpai: EU-mik aalisarneq pillugu isumaqatigiissutip umiatsiaararsorlutik aalisartut tapersersornerusariaqarpai, europamilu niuerfinnut nioqquteqarsinnaanerat pitsanngorsarlugu. Aqqusinernut, tunngaviusumik attaveqaasersuutinut, imermut kuuinnartumut anartarfinnullu kuutsittakkanut annertoorujussuarmik aningaasalersuinissaq pisariaqartinneqarpoq.
"EU-mik qaninnerusumik suleqateqarnissaq tunuarsimaarfiginngilara, kisianni suleqatigiinneq aalajangersimasumik kommunitsinni innuttaasut inuuniarnerminni atugarisaannik pitsanngorsaaniarnermik imaqartariaqarpoq," taama oqarpoq Lars Erik Gabrielsen (S), Avannaata Kommunia.
