Ullaarnaniit meeqqat arlallit angajoqqaatik apersulersimavaat: ”Qaqugu timersortarfiliassuugut?” – Kullorsuarmilu timersortarfeeqqap matui kiisami sapaammi 21. september 2025, nal. 16 ammarmata, ilaqutariippassuit silataani piareersimapput, isernissartik utaqqisinnaanngingajavillugu.
Taqqamaniippoq pississaartarfissuaq (hoppeborg) sisooraartarfillu (rutsjebane) qalipaatigissaaqisoq.
Timersortarfeeraq illarpalaamik, nukimmik nuannaarlunilu nilliallattarnermik ulikkaarneqarpoq, meeqqat pississaartut, sisooraartut tamannguallu unammiuaartut takussaallutik.
Naammangittarlutik siuleriiaattarput tullinnguuteqqinnissaminnut – arlaannaataluunniit kissaatiginngilaa taamaatinnissani, taama oqaluttuarpoq Avannaata Kommuniata Kullorsuarmi sunngiffimmi aqutsisua Birgitta Kamman Danielsen.
”Nuanneqaaq, sapaammi ualikkut taama amerlatigisut aggersinnaammata. Qujanarujussuarlu kajumissutsiminnik ikiuullutik sunik tamanik piareersaasimasunut,” sunngiffimmi aqutsisoq oqaluttuarpoq.
Illorsuaq pississaartarfik sisooraartarfillu ukiaanerani atuanngiffeqarnerup nalaani uteqqissapput!
Oktobarimi meeqqat inersimasullu aamma arsamik eqqoriaasaqattarummik (fodbold-dart) nutaamik misilittaajartorsinnaapput.
Suliniuteqartuuvoq Peqatigiiffik Kalaallit Meerartaat, Kullorsuarmi misigisassanik pitsaasunik a amerlanerusunik pilersitsiniarluni ataatsimoornerullu nukittorsarneqarnissaanik siunertaqarluni, sammisassanik nutaanik pisisimasoq.
Tamanna suliniutip ”Ikioqatigiinneq”-mik taaneqartup ilagaa, innuttaasut kajumissutsiminnik sunngiffimmi aqutsisumik suleqateqarlutik qaammammut marloriarlutik meeqqanut, inuusuttunut ilaqutariinnullu sammisassanik nuannersunik toqqissisimanartunillu ingerlatsiffigisartagaat.
