Borgmesteri Lars Erik Gabrielsen (s) Upernaviup eqqaani angalanikuuvoq, tamaanilu najukkami aalisartut ataatsimeeqatiginerani aalisartut unamminartitaat ersarissarneqarput. Ukioq manna pisassiissutit 30 procentiisa missaat taamaallaat pisarineqarsimapput, tamannalu aalisartunut aamma Avannaata Kommunianut ernumanermik pilersitsivoq.
Upernavimmi eqqaanilu aalisartut oqaatigaat najukkami qassutit suli immap naqqani uninngasut avatangiisinut aamma piniarfissatut periarfissanut ajoqutaasut. Atortut atorunnaarnikut aalisakkanik suli pisaqartarput immamullu mingutitsisarlutik, taamaattumillu siunnerfeqaqqissaartumik saliisoqartarnissaa pisariaqartinneqarpoq.
- Aalborg-imi aalisarnermut niuffatsitsineq soqutiginartorujussuuvoq ullumikkut unammilligassatsinnut atatillugu.. Imaq saligaatsoq aamma piujuartitsisoq siunissatsinnut pingaarutilerujussuuvoq. Aaqqiissutissat tassunga tungaanut tikkuussisut pingaaruteqarluinnarput, borgmesteri Lars Erik Gabrielsen (s) oqarpoq.
Aalborg-imi aalisarnermut niuffatsitsinermi atortorissaarutit assigiinngitsut saqqummersinneqarput aalisarnermut atortut tammaannarnissaannut pinaveersaartitsisinnaasut. Kalerrisaarut mikisoq qassutinut ningittakkanullu ikkunneqqarsinnaasoq, kalerrisaarisinnaavoq taamaalillutik aalisartut atortutik immami itigaluartumiluunniit sumiissusersillugillu qaqissinnaaniassammatigit..
-Atortorissaarutit eqqortut atorlugit imaq eqqaavigiunnaarsinnaavarput saniatigullu pisuussutigut illersorlugit, Lars Erik Gabrielsen (s) oqarpoq.
Avannaata Kommunia maannakkut pisiniartarfiit aalisartullu oqalliseqatiginissaannut qaaqqorusuppai qanoq najukkami atortorissaarutit atorneqalersinnaanersut pillugu.
Niuffannermi aamma qassutit qaqinneqanngikkaangamik namminneerlutik piuneeruttartut saqqummiunneqarput. Borgmester Lars Erik Gabrielsen (s) pisiniartarfimmut attaveqarsimavoq qassutillu pissarsiarineqarsinnaalerpata misilittarnissai pilersaarusiorlugu.
