Upernaviup eqqaani inoqarfiit qulaaluat tamarmik borgmesterimit Lars Erik Gabrielsenimit (S) tikinneqaqqammerput. Innuttaasut 220-nit amerlanerusut aqqutaani innuttaasunik ataatsimiisitsinerni ingerlanneqartuni peqataapput.
Ataatsimiisitsinerni borgmesteri kommunip takorluugaanik saqqummiussisarpoq, aamma apeqqutinut, isummersuutinut ernummatinullu tusarnaarluni.
”Angalaarnerup takutippaa inoqarfinnik mikinerusunik ineriartortitsineq kommunip imminut ataqatigiinneranut qanoq pingaaruteqartigisoq. Isummat nutaat, najukkami piumassuseq ataatsimoorlunilu iliuuseqarsinnaassuseq atorlugit angusaqarluarsinnaavugut. Isumalluartorujussuuvunga,” taama oqarpoq Avannaata Kommuniani borgmesteri, Lars Erik Gabrielsen (S), angalaarnermi kingorna.
Attaveqaasersuutit pitsaasut ulluinnarni oqilisaassisuupput
Inoqarfinnut tikeraarnermi pingaarnertut sammineqarpoq attaveqaasersuutit pitsaanerunissaat. Borgmesterip erseqqissarpaa aqqusernit, imeq, innaallagiaq assartuussinerlu pingaartinneqartorujussuummata. Innuttaasut arlallit oqaluttuaraat takutillugillu aqqusernit qanoq ajortiginerat, ingammik eqqagassat, nioqqutissat atortussallu assartorniartarnerat qanoq ajornakusoortigisarnersoq. Amerlaqisuni illuni paaqqinnittarfinnilu imeqanngilaq.
”Pitsaasunik aqqusineqarpat, imermik kuuinnartoqarpat, assartuineq umiarsualiviillu pitsaaneruppata, taava ineriartortitsinissamut nukissanik amerlanerusunik peqalissaagut,” borgmesteri oqarpoq.
Sumiiffinni arlalinnut betonimik aqquserniornissamut atortussat tikisinneqareersimapput, kommunimilu inoqarfiit ilaanni nammineq kajumissutsiminnik suliaqartut sanaartortulluunniit aqquserniorlutik aallartereersimapput.
Ilaqutariit pitsaanerusunik atugaqassapput
Innuttaasunik ataatsimiisitsinerni aamma innuttaasut atugarisaat sammineqarluarput. Borgmesterip erseqqissarpaa ilaqutariit nukittuut, taavalu meeqqat inuusuttullu inuunerissaartut imminnut ataqatigiilluinnarmata.
”Sinaakkusiisariaqarpugut akiuussinnaassuseqalersitsisumik iliuuseqarsinnaalersitsisumillu peroriartorfissaqarfissatsinnik. Sulisunik ilinniarsimasunik tapersersorneqarnissamik najukkamilu nukissanik suliamut pimoorussisunik peqarnissamik tamanna pisariaqartitsivoq,” oqarpoq.
Angajoqqaat arlallit tikkuarpaat, najukkani suliniutit annikikkaluartut iluaqutaasartut. Borgmesterip nassarpaa amerlasuunngorlugu atuagaaraq ”Uummatinni Ilinnut” Piitannguaq Angi Alaufesenimit atuakkiarineqarsimasoq, ataatsimiigiarsimasullu kaammattorpai atuaqqullugu. Atuakkat tamakkerlugit tiguneqarput.
Inuunerissaarneq illullu pitsaasut aamma imminnut ataqatigiilluinnarput. Illutaarniarluni aningaasanik attartornissamut periarfissat pillugit illoqarfinni tamani paasisitsiniaalluni ataatsimiisitsisarnerit aallartinneqareerput. Borgmesterillu ilanngullugu oqaluttuaraa Namminersorlutik Oqartussat naapinnissaat kissaatigalugu, illut nutaat allallu suleqatigiissutigineqarsinnaanerat siunertaralugu.
Ataatsimut ajornartorsiutit akimuisut
Nunaqarfinni aqutsisut akisussaaffeqarnerulernissaat, najukkamilu najugaqartut, assersuutigalugu sanasunik avataaneersunut sanilliullugit atorneqarnerunissaat arlalinnit siunnersuutigineqarpoq.
Inoqarfinni qulaaluani tamani oqaatigineqaqattaarpoq, ilaqutariinnut inuusuttunut inissiat, meeqqanut inuusuttunullu sunngiffimmi neqeroorutit, talittarfiit pitsaanerusut eqqakkanulllu amerliartuinnartunut aaqqiissutit amingaatigineqartut.
Apeqquteqarusunneq annertuvoq. Innuttaasunillu ataatsimiisitsinerit akunnerni 3-4-ni ingerlanneqartarput, oqaaseqarusuttullu tamarmik oqaaseqartinneqartarlutik. Najukkani nunaqarfinni aqutsisunut ilaasortat aamma ataatsimiisitsinerni peqataapput, borgmesterilu inoqarfimmi alakkarterisillugu ingiaqatigisarpaat, siunnersuutit aaqqiissutaasinnaasullu aalajangersimasut itisilertarlugit.
”Nammineerluni iliuuseqarusunneq sakkortoorujussuuvoq tamannalu pingaaruteqarpoq. Aaqqiissutissat najukkani nanineqartariaqarput atorneqarlutillu, pingaaruteqarporlu kikkulluunniit iliuuseqarsinnaanertik suleqataasinnaanertillu takussagaat,” Lars Erik Gabrielsen oqarpoq.
Qanimut oqartussaaqataaneq nukittorsarneqassaaq
Inoqarfinni arlalinni ataatsimiisitsinerit ersaattaannermik borgmesterillu angalaarluni tikitsineranik qujaniarnermik naggaserneqartarput.
Borgmesterillu aamma nuannaarutigaa taama amerlatigisut ornigummata oqallinnermilu peqataallutik:
”Inoqarfiit ineriartortinneqassapput, qanimullu oqartussaaqataaneq nukittorsarneqassooq. Innuttaasut najugaanni tikillugit naapinneri uannut pingaaruteqarpoq. Pissutsit ulluinnarni initugineqartut nammineq isinnik takullugit siutinnillu tusaallugit,” Avannaata Kommuniani borgmesteri Lars Erik Gabrielsen (S) oqarpoq. Oqaluttuarporlu pissutsit pingaarutillit arlallit Kommunalbestyrelsimut oqqutissamaarini.
Angalaarneq 20-25. septembari 2025 ingerlanneqarpoq, tallimanngornermi 19. septembari Upernavimmi innuttaasunik ataatsimiisitsinermik aallarnerlugu.
