Pikkorissaaneq kingulleq Upernavimmi naammasseqqammerpoq.
Avannaata Kommuniani allattoqarfimmi, Ilulissaniittumi, nunaqarfinnut siunnersortimut taartaasup, Andreas Willep, Upernaviup eqqaani Nunaqarfimmi Aqutsisut taakkualu allattaat, Upernavimmi sapaatit akunneranni 45-imi pikkorissarpai.
- Nunaqarfimmi Aqutsisut Upernaviup eqqaaniittut taakkualu allataat katillutik 30-it missaanniittut pikkorissarput. Nunaqarfimmi Aqutsisut suleriaasaat allattaasartullu imaqarnilioriaasissaat tassani sammineqarput. Pikkorissarneq naammassilluarpoq, peqataasut oqallilluarnerat pitsaavoq, Andreas Wille oqarpoq.
Pikkorissartoq: Pissarsiaqarnarpoq
Aron J. Larsen, Nuussuarmi Nunaqarfimmi Aqutsisut siulittaasuat, Naleqqameersoq, Upernavimmi pikkorissanermut peqataavoq. Pikkorissaqataanini ima oqaasertalerpaa:
- Nunaqarfinni Aqutsisunut ilaasortatut nutaajuvunga, taamaattumik peqataanera uannut ajunngilaq. Pissarsiaqaatigaara aamma ukiumut ataasiarluta naapittarsinnaagutta pitsaassaaq, Aron J. Larsen (N) oqarpoq.
Avannaata Kommuniani Nunaqarfinni Aqutsisut suleriaasaanni allassimasut ilaat naapertorlugu, Nunaqarfimmi Aqutsisut ukiumut ataasiarlutik naapillutik isumasioqatigiittarsinnaapput.
Ilulissat, Qaanaaq Uummannarlu
Nunaqarfinnut siunnersortimut taartaasoq Ilulissani, Qaanaami Uummannamilu siusinnerusukkut pikkorissaareerpoq. Taamaattumik Avannaata Kommuniani Nunaqarfimmi Aqutsisut taakkualu allattaat maanna tamakkerlutik pikkorissarsimalerput.
- Avannaata Kommuniani nunaqarfinni 21-ini nunaqarfinnut aqutsisoqarfiit aqqaniliupput. Nunaqarfiit ilaat nunaqarfinnik arlalinnik aqutsisoqateqaramik. Avannaata Kommuniani Nunaqarfimmi Aqutsisunut ilaasortat 47-it, taakkualu allattaat aqqanillit, maanna pikkorissarnissamik neqeroorfigineqareersimalerput. Taamaattumik sulilluarnertik pitsaasumik nangiinnarsinnaassagaat naatsorsuutigaara, Andreas Wille oqarpoq.
Avannaata Kommuniani Nunaqarfinnut Aqutsisut nutaat upernaaq qinerneqarput. Taakkua ukiuni tulliuttuni sisamani qinikkatut atuutissapput.
