Namminersorlutik Oqartussanit ataatsimoortumik tapiissutit kr. 30 mio.-nik sipaarniarfigineqaraluartut kommunip inoqarfinni anginerni mikinerusunilu nangittumik pingaarnersiuilluni oqimaaqatigiissitsillunilu aningaasaliissuteqarpoq.
Kommuni pingaarutilimmik alloriarpoq piffissamut alimasinnerusumut pilersaarusiorami, inoqarfinnit tamanit kissaatigisat atorfissaqartitallu ukiunut sisamanut missingersuusiorfiusunut agguataarnerisigut. Periaatsip nutaap manna tikillugu ukiut ataasiakkaarlugit pingaarnersiuisarnermik periuseqarneq taarserpaa, ineriartortitsinermik suliaqarnermi patajaannerulersitsilluni ataqatigiinnerulersitsillunilu.
2026-imi sanaartugassanut sinaakkutissat kr. 130 mio.-niit kr. 110 mio.-inut apparneqarput. Taamaakkaluartoq aningaasanik nuutsiterinikkut iluatsinneqarpoq suliassaqarfinni pingaaruteqartuni, soorlu atuarfeqarnerup iluani, kiffartuussinerup aammalu atugarissaarnissamut tunngasuni, sanaartornermut pitsanngorsaanermullu aningaasaliisoqarsinnaalluni. Tamakku tamarmik siunertaralugu innuttaasut ulluinnaasa oqinnerulernissaat.
Immikkut pingaaruteqartutut nunaqarfinni illoqarfinnilu aqqusinigissaaneq nangittumik eqqumaffigineqarpoq. Tikikkuminassuseq atassuseqaasersuinerlu pitsaanerusoq qulakkeerumallugu aqqusernit pitsanngorsarneqarlutillu iluarsaanneqarput.
Inoqarfiit mikinerusut eqqarsaatigalugit najukkami aningaasat immikkut atorneqarsinnaasut innuttaasumut ataatsimut kr. 500-niit kr. 1.000-imut qaffanneqarput, taamaalilluni inoqarfinni ataasiakkaani eqaannerusumik suliniutinik ingerlatsisoqarsinnaalersillugu.
Missingersuutittaaq imaqarput sanaartugassatut pilersaarutinik, ilaatigut ulittarneranut illersuutinik, kiisalu sannavinnik katiterisarfinnillu nutaanik inerisaanermut, assersuutigalugu quersuarnik sisammik sananeqaatilinnik. Sunngiffimmi sammisassaqartitsiniarneq nukkorsarniarluguttaaq aningaasaliisoqarpoq.
Kommuni aamma aalajangerpoq maskinanik angisuunik pisiniarluni, nammineerluni pingaartumik inoqarfinni anorimut sammisuni, ullumikkullu naammattumik assiaquteqanngitsuni, sapusiorluni illersuusiorsinnaaneq siunertaralugu.
Peqatigitillugu innuttaasut kaammattorneqarput nammineerluni illuliornermik periarfissaq atorluarneroqqullugu, najukkani inissialiortiterneq nukittorsarumallugu.
Avannaata Kommuniata ilisimavaa paasisinnaallugulu suli amerlanerujussuarnik kissaateqarlunilu atorfissaqartitsisoqartoq, erseqqissarlugulu pingaaruteqarmat ingerlariaqqinnissami oqaloqatigiinnissaq, suleqatigiinnissaq paaseqatigiinnissarlu.
Suliatigut ineriartorneq missingersuutinillu atuutsitsiniarneq pillugu kommuni ataavartumik paasissutissiisarniarpoq.