Avannaata Kommuniani kommunimut akileraarut allanngorani 28 %-iuinnassaaq.
2026-imut missingersuut Avannaata Kommuniani isumaqatigiinniutigineqareerluni inissippoq Kommunalbestyrelsimilu isumaqatigiiffiusumik akuersissutigineqarluni. Ataatsimut isigalugu missingersuuttikkut qulakkeerneqarpoq politikkikkut akisussaassuseqartumik aningaasatut aqutsineq nanginneqassasoq.
Kommunimi inoqarfinni tamani, avannarpasinnerminngaaniit kujasinnerpaaq ilanngullugu, ineriartortitsisoqarnissaa ukiunut sisamanut tulliuttunut missingersuummi pingaartinneqarpoq. Meeqqanut, inuusuttunut ilaqutariinnullu meerartalinnut aningaasaliisoqarpoq, takornariaqarneq inuussutissarsiutillu allat aamma nukittuumik kivitsivigineqassapput.
Ukioq manna missingersuutit pillugit isumaqatigiinniarneq, kommunalbestyrelsimut maannakkut issiasumut borgmesteri Lars Erik Gabrielsen siuttoralugu siulliuvoq, suliassaqarfiillu arlallit ataatsimoortumik paaseqatigiissutigineqarput.
”Nuannaarutigaara naammassigatta kikkullu tamarmik 2026-imut missingersuutini aningaasartuutissat immikkuualuttortaannik pingaarnersiueqataanissaminnut periarfissaqarsimammata. Qujanartumik atituumik isumaqatigiissutigineqarpoq, assersuutigalugu inuussutissarsiornikkut nukittorsaanissaq aamma meeqqat inuusuttuaqqallu eqqarsaatigalugit suliniutit, taamaattumik siunissaq pitsaasumik neriuuteqarfingaara”, Avannaata Kommuniani borgmesteri, Lars Erik Gabrielsen oqarpoq.
Kisitsisit pingaarnerit Avannaata Kommuniata 2026-imut missingersuutaani
- Ingerltsinermut aningaasartuutit (sanaartorneq ilanngullugu): 1,114 mia. kr.
- Sanaartugassanut atungassat 120,2 mio. kr.
- Isertitat: 1,122 mia. kr.
- Ingerlatsinermi angusassaq: 7,377 mio. kr.
- Kommunip aningaasat tigoriaannaatissai, 2026-p naanerani: 120,3 mio. kr. (inatsisini piumasaqaatit iluanni)
- Kommunimut akileraarut: Allanngortinnagu 28 %
Naak kommunip aningaasaqarnerani aningaasatigut sinaakkutissat Namminersorlutik Oqartussat ataatsimoortumik tapiissutaasa annikillineqarnerannit Akileraartarnermullu Naalakkersuisoqarfiup 2026-imi akileraarutitigut isertitassat 2025-imut sanilliullugit ikinnerusussatut naliliineranit sunnersimaneqaraluartut, taamaattoq missingersuutini ineriartorneq sinneqartoornissarlu politikkikkut inissaqartinneqarsinnaasimapput, inatsisitigut periarfissarititaasut iluanni.
Inoqarfinnik mikinerusunik ineriartortitsineq
Missingersuusiornermi pingaartinneqarsimavoq kommunimi inoqarfinni mikinerusuni 21-iusuni inerartortitsinerup nukittorsarnissaa. Taamaattumik 2026-imi makkununnga aningaasaliissuteqarnissaq pingaarnersiuinermi ilaatinneqarsimavoq:
- Inoqarfinni arlalinni puttasunik pilersitsineq
- Aqqusernit cementimik qallikkat pitsanngorsarneri nutaanillu pilers Aqqusinigissaaneq aqqusinernillu nutaanik cementimik qallikkanik pilersitsineq, katillugit 7 mio. kr. miss. nalilinnik
”Ukiuni tulliuttuni inoqarfinni mikinerusuni inuuniarnikkut atugassarititaasut oqilisaaffigerusuppagut pitsaanerulersikkusullugillu. Tamatumani attaveqaasersuuteqarneq aallarniutigaarput, taamaattumik nunaqarfinni aqqusernit cementimik qallersornissaannut aningaasaliivugut ukiunilu tulliuttuni sisamani, 2026-2029, sanaartornermut aningaasaliissuteqartarnissarput pilersaarusiorlugu, tamanna kikkut tamarmik takusinnaasavaat pingaarnersiuinitsinni ilaatikkipput neriorsuutigisimasagullu aalajangiusimagigut”, bormgesteri oqarpoq.
Tikkuarpaa tamanna Siumup Naleqqallu suleqatigiinnissamut isumaqatigiissutaasa imarisaanut naapertuuttoq. (takuuk suleqatigiinnissamut isumaqatigiissut Kommunalbestyrelsen)
Takornariaqarneq nukittorsarneqarpoq, inuussutissarsiutinik ineriartortitsineq ilaqutariinnullu meerartalinnut atugassarititaasut pitsaanerusut
2026-imut missingersuutini immikkut siunnerfilimmik suli niutissanut arlalinnut aningaasaliisoqarpoq, inuussutissarsiornikkut ineriartortitsinermi siuarsaataasussanik suliffeqarfinnillu ingerlatsinermi oqinnerulersitsisussanik, apeqqutaatinnagu kommunip suatungaani najugaqarneq. Assersuutigalugu Nalik Venture-p suliffeqarfinnik aallartisaanermik inuussutissarsiutitigullu ineriartortitsinermik suliaqartup suleqatiginissaanut aningaasaliisoqarpoq. Inuussutissarsiornermut siunnersorti atorfinitsinneqassaaq kommuni tamakkerlugu siunnersuisartussamik, Ilulissanilu nutaamik allaffeqartussamik.
Kommunalbestyrelsi aamma 2026-imi aningaasaliissuteqarpoq takornariaqartitsinermut. Takornariaqartitsineq inuussutissarsiutitigullu ineriartortitsinissaq nukittorsarumallugu takornariaqarnermut ingerlatseqatigiiffik nutaaq ”Visit Greenland” pilersinneqarpoq, takornariartitsisartunik katersuisussaq takornariartitsisarnermilu ataqatigiissaarinermik nukittorsaasussaq.
Siunertaavoq kommuni tamakkerlugu najukkani innuttaasunut iluaqutaasumik takornariaqarnerup ineriartortinnissaa, najukkanilu innuttaasut najugaqartut qanittumik suleqatigalugit tamatuma pinissaa.
Ilaqutareeqarnermut tunngatillugu aningaasaliisoqarpoq, assersuutigalugu:
- Ilaqutariinnik siunersioqatigiissitsisarnerup nanginneqarnissaa meeqqat inuusuttullu arlaatigut inuunerluuteqartut akornanni pinaveersaartitsinermik iliuuseqarnertut.
- Sulisut ”angerlarsimasutut” ilaqutariinni allanilu ikiorneqarnissamik pisariaqartitsisunik suliniutinik aalajangersimasunik suliaqartussat
- Ilaqutariinnut meerartalinnut tamarluinnangajannut paarsisitsineq akikinnerusoq
Missingersuutit aamma pingaarnersiuinernik imaqarput, assersuutigalugu:
- Ilulissani multihal aamma meeqqat, inuusuttut ilaqutariillu periarfissaannik nukittorsaassaaq
- Kommunit illuutaanik iluarsaassineq
- Illu sullivinnik meeqqerivinnillu aserfallatsaaliuineq
Qinikkat akornanni naatsorsuutigineqarpoq, assersuutigalugu ilinniartitsisunut, perorsaasunut, ingerlatsinermi sulisunut aamma suliaqarfinni allani sulisunut atorfinitsitsisoqarnissaanik pisariaqartitsiviusuni, soqutiginarnerulissasoq, kommunip suliffiutaani sinaakkutissat pilerinarnerulerpata.
”Neriorsuutit tamakkerlugit ukiup ataatsip ingerlanerinnani piviusunngortissinnaanngialgut, kisianni pilersaarusiorsimavugut ukiunullu sisamanut agguataarlugit aningaasaliisimalluta, taamaalilluta kommuni tamakkerlugu atituumik ineriartortitsineq pilersillugu,” Avannaata Kommuniani borgmesteri Lars Erik Gabrielsen oqarpoq.