Ullaap tungaani Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Nivi Olsen Danmarkimi ilinniartitaanermut ministeri Matthias Tesfaye peqatigalugu Atuarfik mathias Storch-imut pulaarput. Tassanilu ministerit atuarfiup pisortaaniit Julias Jeremiassen-imit angallanneqarput taassumallu oqaluttuarai atuarfimmi ulluinnarni suliassat suusarnersut aamma Ilulissani Majoriamut suliassaqarfiit akimorlugit suleqatigiinneq oqaluttuaraa.
Ualikkut Majoriamut pulaarneq ingerlanneqarpoq tassanilu immikkoortortaqarfimmi aqutsisoq Karen Marie Vilhemsen ilinniarfimmit ilisarititsivoq ministerillu atuarfimmi angallallugit.
Kommunimi suliffeqarfiit aaqqissugaaneri kiisalu Avannaata Kommuniata inuusuttut suliffeqarfinnut amerlanerusut appakaatsinnissaannut suliniuteqarnera eqqartorneqarput. Tassungalu atatillugu inuussutissarsiornermut ilinniarfissamut pilersaarutit sammineqarlutik.
”Nuannaarutigeqaarput Ilinniartitaanermut Naalakkersuisoq aqqusaarluni inuussutissarsiornermut ilinniarfissatsinnut pilersaarutigut tusagaqarfigimmagit, Naalakkersuisunik suleqateqarnerput nuannarisorujussuuarput aamma neriuppugut inuussutissarsiornermut ilinniarfittaassatta annertuumik ilippanaateqarneranik takunnissinnaassasut.” Lars Erik Gabrielsen (S), Avannaata Kommuniani borgmesteri oqarpoq.
Kommunalbestyrelsit aamma borgmester Lars Erik Gabrielsen-ip (s) kissaatigaat inuussutissarsiornermut ilinniarfittaassaq Majoriap illutaani inissisimalissasoq. Kommunalbestyrelsit kissaatigaat ilinniarfimmi mittarfeqarfinnut aamma angallassinernut, unnuisarfinnut aamma kiffartuussinermut, isumaginninnermut paaqqutarinninnermullu sullissinermut, aalisarnermut kiisalu aallarnisaanermut ilinniartitsinerit pikkorissaanerillu neqeroorutigineqalissasut.
Matumani isiginiarneqarpoq Avannaata Kommuniani takornarialerinerup ukioq naallugu ingerlanneqartalernissaa, taamaasillunilu ukiup ilaannaani ingerlanneqartarrunnaarsillugu. Tassanilu siunertaavoq kommunimi inuusuttut illoqarfigisartik qimaqqaarlugu ilinniagaqarnissaminnut taamaallaat periarfissaqannginnissaat, taamaammallu aamma neriuutigineqarpoq ilinniakkaminnik unitsitsiinnartartut ikilissasut.