Saqqaq aamma Saint-Aubin-sur-Mer illoqarfittut ikinngutigiilerput, Kalaallit Nunaata Frankrig-illu akornanni attaveqarneq nukittorsarumallugu, pingaarnerutillugit kulturi, piujuartitsineq, ilinniartitaaneq aamma meeqqat inuusuttullu nunarsuarmut alakkaamasaqarnerulernissaat.
Qaammammi matumani siusinnerusukkut angalaqatigiit Avannaata Kommunianeersut Saqqaq sinnerlugu peqataasut ilagalugit Frankrig-ik sineriaani illoqarfik Saint-Aubin-sur-Mer tikeraarpaat, tassanilu inoqarfiit taakku marluk pisortatigoortumik ikinngutigiilerput.
Suleqatigiinnermi siunertarineqarpoq Kalaallit Nunaata Frankrig-illu akornanni attaveqaqatigiinnerup nukittorsarnissaa, kulturikkut paarlaasseqatigiinneq, ilinniartitaaneq aamma ataatsimoorluni avatangiisit piujuartitsinermillu tunngaveqarluni ineriartornissamut suliniutit eqqarsaatigalugit.
Tikeraarneq aamma suliniummut ”Bridges Between Us” (ikaartarfiit akunnitsinniittut) ilaavoq, tassani pingaarnermik sammineqarlutik ilinniartitaaneq, atuakkialerineq kulturikkullu kingornussat, tamannalu Saqqami atuarfiup, Saint-Aubin-sur-Mer aamma artEresforeningip (Dodo Vole Editions) akornanni suleqatigiilluni ineriartortinneqarsimavoq.
Oqaluttuat, assilialiorluni eqqumiitsuliat meeqqanullu atuakkat oqaatsinik marlunnik oqaasertallit aqqutigalugit Kalaallit Nunaanni Normandiamilu meeqqat inuunertik, oqaatsitik ileqqutillu ilinniassavaat kulturikkullu assigiinngissutsit ataatsimoorfiillu pillugit paasinninnermik inerisaassallutik.
Suliniut ”Ikaartarfiit akunnitsinniittut” siunertaqarpoq Kalaallit Nunaata Normandiallu akornanni oqaloqatigiinnerup nukittorsarnissaanik, kinguaariit inuusunnerusut ineriartornermut ataatsimoornermullu kulturip pingaaruteqassusianik paasisaqartissallugit, atortorissaarutillu digitaliusut atorlugit paarlaasseqatigiinnerit suleqatigiinnerillu, tamat oqartussaaqataanerannik inoqatinullu attaveqarnermi pisinnaasat siuarsarlugit.
” Ikinngutigiilluni suleqatigiinnerup pingaarnertut meeqqanut iluaqutaanissaa kissaatigaarput. Meerartatta kulturikkut inuusaasikkullu, assigiiffiit assigiinngissutsillu taamatut avitseqatigiinnermi ilikkakkatik misigisatillu isumassarsiorfigalugit angerlaallugit atorlualertussaammatikkit, taama oqarpoq Avannaata Kommuniani Piorsarsimassutsimut, Atuartitaanermut, Meeqqeriveqarnermullu ingerlatsivimmi ataatsimiititaliami siulitaasoq, Paarnannguaq Mathiassen oqarpoq.
Saqqap aamma Saint-Aubin-mer-Sur akornanni suleqatigiinnermi samminiarneqarputtaaq avatangiisit illersorneqarnissaannut suliniutit, silap allanngoriartorneranut naleqqussarnerit, eqqagassalerinerit aamma nukimmik ataavartumik ineriartortitsineq. Atuartunik paarlaassseqatigiissitsisinnaaneq, ilinniariartorsinnaaneq/oqaatsinik ilinniariartorsinnaaneq, kiisalu kinguaariit akimorlugit naapeqatigiissinnaanerit suliniutigineqartussatut aamma eqqarsaatigineqarput.
Avannaata Kommuniani borgmesterip, Lars Erik Gabrielsen-ip (S) taamatut suliniuteqarnerup kommunip nunat tamalaat akornanni suliniuteqarneranut pingaaruteqassusia erseqqissarpaa:
”Saqqap aamma Saint-Aubin-sur-Mer-ip akornanni peqatigiinneq tulluusimaarutigaarput. Tamatuma takutippaa kulturit akornanni ikaartarfiliornikkut qanoq annertutigisumik angusaqartoqarsinnaasoq. Peqatigitillugu Uummannap aamma Granville-p akornanni illoqarfittut suleqatigiinneq ingerlavoq, killingusaammi ungataanut alakkaamanissarput peqqinnartuuvoq nunarsuullu sinnera suminngaaneernitsinnik takutillugu.”
Tikeraarnermi angalaqatigiit workshop-inut, atuarfinnut pulaarnernut kulturikkullu aaqqissuussanut peqataapput, mislittakkanik paarlaasseqatigiittoqarluni innuttaasullu, atuartut sulisullu akornanni attaveqaatinik nutaanik
