Scenemiipput Johannes Mølgaard aamma Herluf Møller tunniusimasunik tusarnaartunik amerlasuunik isiginnaartulerlutik tusarnaartullu erisarsoqataallutillu nipilersuutinut nuannisarput.
H.E.J-ip nipilersuusiai ukiorpassuarni Iluliarmiunut sineriamiittunullu allanut annertuumik isumaqarsimapput. Tamannalu peqqutigalugu Avannaata Kommuniani innuttaasut ilaanniit kissaatigineqarsimavoq nipilersortartut suliaqarsimanerannut immikkut ittumik nersorniarneqassasut.
Nersorinninniarneq Avannaata Kommuniani Kommunalbestyrelsimit aaqqissuunneqarpoq, taakkualu Johannes Mølgaard aamma Herluf Møller qaaqqusimavaat. Aaqqissuussap ingerlanerani Piorsarsimassutsimut, Atuartitaanermut, Meeqqeriveqarnermullu Ataatsimiititaliami siulittaasumit Paarnannguaq Mathiassen-imit nersornaatit tunniunneqarput.
Avannaata Kommuniata Herluf Møller aamma Johannes Mølgaard nersornaaserneqarnerannik pilluaqquai aamma ukiorpassuarni nipilersuusiatik aqqutigalugit innuttaasunut nuannaartitsisarsimanerannik qujaffigalugit.
