Ukiut tamaasa Avannaata Kommuniata timersortartut namminnerlu kajumissutsiminnik suliaqartartut ilisaritittarpai, tunniusimanertik aqqutigalugu meeqqat inersimasullu nukittunerusumik ataatsimuussuseqalernissaannut pilersitsinikunik.
Timersullammak najukkami aaqqissuussisoqarneranik malunnartinneqartarpoq, innuttaasullu piukkussaminnik innersuussisinnaasarput timersortartuunerullu aqqani unnussiuaaqatigiinneq ataatsimuualaarfigalugu. Illoqarfinni Qaanaami, Upernavimmi aamma Uummannami nersornaasiinerit malunnartinneqarnissaat suli ingerlanneqanngillat kisianni Avannaata Kommuniata nittartagaa aamma Facebook-imi quppernera malinnaaffigineqarsinnaapput.
Ilulissani tulliuttut nersornaaserneqarlutik ajugaapput:
Ukiup iligiivi I-69 Angutit Volleyball-ertartut
Ukiup iligiivitut toqqarneqartut toqqarneqarput ataqatigiilluarnertik aamma ingerlalluartumik iligiittarnertik peqqutigalugu. Iligiit inuusuttunik, inersimasunik aamma ukioqqortunerusunik ilaasortaqarpoq, 2025-milu unammersuarnerni inuusuttut unamminerni pingaaruteqarluinnartuni akisussaaffimmik tigusipput, misilittagartuunit tapersersorneqarlutik aqunneqarlutillu. Ataqatigiinnerallu nukittooq tamanna tunngavigalugu iligiit timikkut tarnikkullu angusarissaarujussuarsimallutik.
Neriunaatilik Danny Clasen
Danny Clasen timersuutit Arctic Sports aamma Dene Games neriunaatilittut nersornaaserneqarpoq. GM-imi angusarissaarnerujussua, matumani tallimanik guld-innannerata, marlunnik sølv-innannerata ataatsimillu bronze-nnannerata Neriunaatilittut nersornaaserneqarneranik kinguneqarpoq. Danny meeraallunili timersortalerpoq ukiunili kingullerni nukini teknikkinilu aallussilluni sulissutigisimallugit tamannalu pitsaanerusumik ataavartumillu angusaqalerneranik kinguneqarluni.
Sungiusallammak – Louisa & Jan Clasen
Aappariit Louisa aamma Jan aalajaallutik inuit pinnguaataannik sungiusaanermik ingerlatsipput. Sungiusaaneq aammalu timersuutinut marlunnut inuit pinnguaataat aamma eqqillit pinnguaataanik ataqatigiissaarillutik sungiusaasarput.
Louisa aamma Jan sungiusaasuulluarneranni Inuit pinnguaataanni aammalu eqqillit pinnguaataanni unammersuarnerni sassartitat amerlanerpaat angusarissaartarput.
Timersoqatigiiffilerillammak - Nagdlunguami meeqqat angajoqqaavi:
Angajoqqaaqatigiit annertuumik timersoqatigiiffimmi sulinermut kivitseqataanikuupput.
Nagdlunguak suliassarpassuarnik aaqqissuussinernillu assigiinngitsunik akisussaaffeqartoq annertuumik oqilisaassisarput, aamma Kioskimik ammatitsillutik ataqatigiissaaralutik. Aalasa CUP meeqqat 500 sinnilit tikillutik unammisaqattaarnerannut suleqatigiillaqqissutsiminni unammersuarneq kusanartumik naammassineqarsinnaaneranut sunniutilerujussuupput.
Ataqqinaammik Nersornaat Nukannguaq Ostermann
Nukannguaq Ostermann, I-69 Angutit Volleyball-ertartunut sungiusaasoq, ukiorpassuarni Ilulissani Nunarpullu tamakkerlugu timersornerup silarsuaani annertuumik sunniuteqarsimavoq. Timersortartut amerlasuut allartinnissaannut kajumissutsimik pilersitsisuusimavoq sulilu suliniuteqarnera ingerlalluni. I-69-iup annertuumik kivinneqarneranut suliniuteqartarsimanera pillugu Ataqqinaammik Nersornaaserneqarpoq, ataatsimoorfiunera nersugaasutullu timersortartuunera sungiusaasuuneralu ilanngullugit.
Timersullammak 2025 Thomas Geisler
Timersuutini tamani tunniusimasuunikuunerminut aamma ataavartuunerminut ilisimaneqarpoq. Tunniutiinanngisaannarnikuuvoq qanorluunniit unammineq ingerlagaluarpat, aamma nammineq iligisarnikuusanilu nukittorsarnissai assut pingaartittarsimallugu.
2024-mi aamma 2025-mi timersortartunik inuusunnerusunik ataavartumik sungiusaqateqartarsimavoq, unammisarnerillu avataatigut teknikkiannik arsamillu aqutsisinnaanerannik pitsanngorsaaniarsaraluni. 2024-mi GM-imi sølv-imik pinnappoq ukiullu sinneranut ajugaanissaminut anguniakkani ingerlannikuullugu.
2025-mi Kalaallit Nunaanni unammersuarnerni unammisartut pingaaruteqarluinnartut ilagaat, arlaleriarlunilu arsarluarnerpaatut qinerneqarnikuulluni. Naak Thomas Geisler akornatsinniikkunnaareeraluartoq timersornikkut angusarisimasai suli nersorneqarput.
Avannaani Timersullammak – Pilutaq Berthelsen
Pilutaq Berthelsen eqeersimaarlunilu tunniusimalluni arpattartuuvoq, aamma angusarissaarneri peqqutigalugit Avannaata Kommuniani Timersullammattut nersornaaserneqarpoq. Timersortartorpalaartumik pissuseqarnera, pissuserissaarnera inuusuttunut inersimasunullu maligassiuilluarneranik ersersitsivoq. Pilutap qasujaatsuunera tunniusimasuuneralu pillugit Nunatsinni arpattartut timersortartullu akornanni maligassiusutut inissinneqarpoq.
Pilutaq arpalluni unammisarnernut amerlasuunut peqataasarpoq aamma ukiut ingerlaneranni angusarissaarsimalluni, ilaatigut:
Siku Cross Uummannaq Marathon: nr. 2
Ilulissat Icefjord Midnight Marathon: nr. 1
Sisimiut Halvmaraton 21 km: nr. 1
Kangia Race: nr. 1
Aasiaat Marathon: nr. 1
Qasigiannguit Kulunnguaq Run: nr. 1
Cecilieløb Oqaatsuniit Ilulissanut: nr. 1
Island Games 1500 m: nr. 11
Island Games 21 km
Kangerlussuaq Polar Circle Challenge Halvmaraton 21 km: nr. 1
Kangerlussuaq Polar Circle Challenge Marathon 42 km: nr. 1
Avannaata Kommuniata 2026-mut Timersullammammut innersuunneqartut tamaasa pilluaqquai, nersornaaserneqartullu tamaasa pilluaqqorujussuarpai. Timersornermut tunniusimanissinnut annertuumut qujanaq.
