Ukiut tamaasa apingaangat Ilulissat Kangiani inuutissarsiuteqartut sulillutik aallartittarput. Aalisartut Kangiani qimussimik aalisarnertik aallartittarpaat, tassungalu atatillungu qalerallit pisarineqartut snescooterinik assartorneqalertarput. Taamatuttaaq takornarialerisut Kangimut angallassineq ingerlatilertarpaat.
Kangianut aqqutit assingiinngittuupput. Ukiorpassuarni Akinnakkut aqqut atorneqartarpoq, taanna aqqut taamaallaat qimussunik atoqqusaavoq. Uani peqqutaavoq Ilulissat imeqarfeqarmat tatsiniit Akinnap eqqaaniittuniit. Imeqarfikkut taassumalu qanitaani snescooterinik ingerlaarnissaq inerteqqutaavoq, nunatsinni aaliangersakkat Inatsisartunit Naalakkersuisunillu suliarineqartut taamatut sinaakkusiipput. Aaliangersakkallu allanngortinneqassasut ukiorpassuarni kommuni sulisimavoq ullumikkumut angusaqarfiunngittumik, kisianni innuttaasut isumaqartarput snescoorinik ingerlaqqusinnginneq kommunip aaliangersangaringaa – taamaanngilaq, taanna Inatsisartuniippoq Naalakkersuisuniillunilu.
Massakkumut ajornartorsiutaasut Naalakkersuisumut susassaqartumut anngunneqarput Akinnakkut snescooterinik ingerlaarsinnaaneq immikkut akuerineqassasoq qinnutingineqarluni, kisianni Naalakkersuisoqarfimmiit suli iliuseqartoqanngilaq.
Naalakkersuisut Siulittaasuat Jens Frederik Nielsen (D) Ilulissani tikeraammat ukioq kingulleq decemberimi ajornartorsiutip iliuseqarfinginissaa oqariartuutingineqarpoq, kisianni aamma suli iliuseqartoqanngilaq.
Meeqqanut, Inuusuttunut, Ilaqutariinnut, Nunamut Namminermut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Nivi Olsen (D) januarimi Ilulissaniimmat innuttaasunut ataatsimiititsilluni aamma ajornartorsiutaasunut oqariartorfingineqarpoq, kisianni aamma suli iliuseqartoqanngilaq.
Ilulissani inuussutissarsiortut Kangianut ingerlasinnaanngillat aqqutit akuerisaasut atorlungit ukiormanna aputeqannginnera peqqutaalluni, taamaattumillu Akinnakkut ingerlaarsinnaaneq immikkut akuerineqassasoq annertuumik innuttaasunit kissaatingineqaraluarpoq aamma tamanna ataasinarnanga Naalakkersuisunut arlalinnut taaneqareersutut annguttarsimangaluarpara iliuseqarfingeqqullungu.
Taamaatumik ulluni makkunani oqallinneq kommunimut pisuutitserpalaartoq isumaqarpunga innuttaasut paaissangaat annertuumik iliuseqarfingiumaneqaraluartoq.
Aqqutit snescooterinik atorneqarsinnaasut, Koororsuakkoortoq imaluunnit Tununngasukkoortoq allanneqareersutut aputikippallaarmat atorneqarsinnaanngillat aamma aaqqissuunneqarnissaat Beernaammut suliakkiutaangaluarput, kisianni apummik amingaateqarneq peqqutingalungu ajoraluartumik periarfissaasinnaanngillat. Aqqutit piaarnerpaamik aaqqinneqassapput aperiarpat.
Ikinngutinnersumik
Avannaani Borgmesteri, Lars Erik Gabrielsen (s)