Avannaata Kommunia aaqqiissutissamik nassaarpoq, taamaalilluni Nunatsinni innuttaasut tamarmik Avannaata Qimussersua malinnaasinnaalersillugit.
Piorsarsimassutsimut, Atuartitaanermut Meeqqeriveqarnermullu ataatsimiititaliaq aaqqiissutissap piviusunngortinnissaanut siunnerfeqarluni sulivoq. Maanna Garmin inReach-inik pissarsisoqarsimavoq, taakkulu peqataasut qaammataasaq aqqutigalugu malinnaavigineqarsinnaanerat periarfissippaat, aammattaaq mobilikkut imaluunniit allatigut attaveqaateqanngitsuni.
๐๐ง๐๐ฆ๐ฆ๐ข๐ง๐๐ช ๐ญ๐จ๐ช๐ช๐๐๐ง๐ง๐๐ซ๐ญ๐ฎ๐ฆ๐ข๐ค ๐ฆ๐๐ฅ๐ข๐ง๐ง๐๐๐ฏ๐ข๐ ๐ข๐ฎ๐ค
Unammineq malinnaavigiumallugu una linki tooruk: https://www.tractrac.com/.../event_20260325_AvannaataQ1/3466
Aamma unammineq mobiltelefonikkut malinnaavigineqarsinnaavoq, TracTrac-imik app-i iOS-imut Androidimullu atugassaq ikkullugu.
Borgmesteri Lars Erik Gabrielsenip nuannaarutigaa maannakkut unammineq tamakkerlugu peqataasut malinnaavigineqarsinnaanngormata:
“Avannaata Qimussersua kulturitsinnut pingaaruteqartorujussuuvoq, aamma innuttaasut amerlasuut Nunatsinniittut unammineq malinnaavigisinnaanissaanik kissaateqarput. Taamaattumik peqataasut unammineq tamaat malinnaavigisinnaanissaat periarfississinnaagatsigu nuannaarutigaarput,” oqarpoq.
Nangipporlu: “Aamma suliniut piffissap sivikikkaluartup iluani piviusunngortinneqarsimammat nuannaarutigaara. Taama sukkatigisumik sunniuteqarluartumillu suleqatigiissinnaanitta pilersinnissaa pingaaruteqartorujussuuvoq.”
Avannaata Qimussersua tassaavoq Kalaallit Nunaanni qimussimik unammersuarnerit nuannarineqarluarnerpaartaat, ukiumullu innuttaasut najukkameersut Nunattalu sinneraneersut soqutiginnillutik malinnaaffigisaat.
Unammersuarneq aqqut 42 kilometerit missaani isorartutigisukkut ingerlanneqartarpoq, tamannalu annerpaartaa eqqarsaatigalugu attaveqaateqarfiunngitsuniippoq. Taamaattumik maannamut qimussersut ingerlaarneranni malinnaaviginissaat ajornakusoortarsimavoq.
Aaqqiissut nutaaq isiginnaartunut pitsaanerusumik misigisaqartitsiinnassanngilaq, aammali peqataasunut isumannaallisaanikkut annertusaaqataassaaq.
Suliniut manna aqqutigalugu neriuutigineqarpoq innuttaasut soqutiginnittullu Avannaata Qimussersua pillugu pitsaanerujussuarmik misigisaqarnissaat, sumiluunniit nunatsinniikkaluarunik.
๐๐ฎ๐ฅ๐ข๐ง๐ข๐ฎ๐ฆ๐ฆ๐ฎ๐ญ ๐ญ๐๐ฉ๐๐ซ๐ฌ๐๐ซ๐ฌ๐ฎ๐ข๐ฌ๐ฎ๐ฎ๐ฉ๐ฉ๐ฎ๐ญ:
Avannaata Kommunia
VB Marine & Service
Garmin Nordic Denmark
Kalaallit Nunaanni Qimussertartut Kattuffiat